miércoles, 12 de agosto de 2026
O Colexio Profesional de Enxeñaría en Informática de Galicia (CPEIG) e a Asociación pola Eco- responsabilidade nas Tecnoloxías da Información e Comunicación (Aecotic) veñen de asinar un acordo de colaboración para o impulso de actividades e iniciativas relacionadas coas green IT, é dicir, a informática verde.
Ao abeiro deste convenio, as dúas entidades acordan colaborar no impulso das green IT con iniciativas e actividades baseadas no concepto amplo da informática verde. Deste xeito, o CPEIG intégrase como socio institucional de Aecotic. A duración do convenio será de dous anos renovables por acordo entre as partes.
MITIGAR O CAMBIO CLIMÁTICO
Ao abeiro do acordo asinado entre Manuel Carlos Delfino Reznicek, presidente de Aecotic, e Fernando Suárez Lorenzo, presidente do CPEIG, búscase impulsar iniciativas, individuais e colectivas, que contribúan a mitigar o cambio climático unindo un uso eficiente das tecnoloxías da información e comunicación; sensibilizar a sociedade, empresas e Administración pública na redución das emisións de CO2; potenciar novas tecnoloxías TIC enerxeticamente sustentables; impulsar a sustentabilidade en áreas intensivas en utilización das TIC; impulsar un centro de referencia internacional sobre políticas, acción e tecnoloxías green IT e propiciar a adopción de medidas de reciclaxe e reutilización.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
