domingo, 3 de mayo de 2026
Tamén se realizaron cursos de formación específica para os profesionais ao servizo das distintas administracións.
No ano 2010, a Secretaría Xeral de Política Lingüística convocou en Galicia, con carácter voluntario e gratuíto, 185 cursos preparatorios para as probas dos niveis Celga 1, Celga 2, Celga 3 e Celga 4, dirixidos a particulares (adultos) e colectivos, entidades e/ou organizacións, nos que participaron un total de 2.595 persoas. Ademais, por primeira vez, a secretaría xeral ofertou en 2010 catro cursos en liña preparatorios para os exames do Celga 1, que contaron cun total de 146 alumnos e alumnas.
Fóra de Galicia tamén se organizaron cursos para preparar as probas Celga e outros de extensión cultural, convocados a través dunha resolución conxunta da Secretaría Xeral de Política Lingüística e da Secretaría Xeral de Emigración. Grazas a esta convocatoria, 500 persoas beneficiáronse dos 20 cursos organizados durante o 2010 en diversos puntos de Europa e de América.
Así mesmo, a través do Espazo Ibérico das Linguas do Instituto Cervantes, a secretaría xeral tamén organizou na sede desta entidade en Madrid cinco cursos formativos de lingua galega, nos que participaron 45 persoas.
Formación específica en galego para os profesionais ao servizo das administracións
De acordo co Plan xeral de normalización da lingua galega, a Secretaría Xeral de Política Lingüística organizou, o pasado ano, cursos para a formación específica en galego do funcionariado das distintas administracións. Dirixidos ao persoal da Administración autonómica, realizáronse, en colaboración coa Escola Galega de Administración Pública, 33 cursos de linguaxe administrativa galega de nivel medio e superior, nos que participaron 825 persoas. En colaboración coas escolas oficiais de idiomas, os cursos ofertados foron 27 e as persoas beneficiarias ascenderon a 675.
Respecto da oferta formativa para o persoal das administracións locais, un total de 150 persoas participaron nos seis cursos de linguaxe administrativa galega organizados conxuntamente coas deputacións de Pontevedra, de Ourense e de Lugo.
A Secretaría Xeral de Política Lingüística tamén incidiu no fomento da competencia lingüística en galego do funcionariado do Estado en Galicia. Fíxoo en colaboración co Instituto Nacional de Administración Pública, a través de 10 cursos de linguaxe administrativa galega de nivel medio e superior, dos que se beneficiaron 180 persoas.
Esta oferta formativa dirixida ao persoal das distintas administracións completouse coa realización de 11 cursos de linguaxe xurídica galega, en colaboración coa Dirección Xeral de Xustiza, nos que participaron un total de 255 persoas.
Outros cursos formativos
Co obxectivo de reforzar a formación do seu profesorado colaborador, a secretaría xeral organizou, por unha banda, as Xornadas de Formación de Avaliadores Celga e mais as Xornadas de Formación de Profesorado Celga, en colaboración coa Universidade de Santiago de Compostela, e, por outra, tres seminarios dirixidos ao profesorado colaborador encargado de impartir os cursos de linguaxes específicas.
O plan formativo desenvolvido pola Secretaría Xeral de Política Lingüística tamén incluíu as xornadas de formación para os 33 lectores e lectoras que imparten lingua e literatura galegas en diversas universidades de Europa e de América. En 2010, estas xornadas incidiron nas posibilidades que ofrecen as tecnoloxías para o ensino e a aprendizaxe de idiomas.
No marco dos convenios de colaboración coas universidades da Coruña, de Vigo e de Santiago de Compostela, a secretaría xeral impulsou en 2010 diversos cursos de capacitación en galego dirixidos tanto ao estudantado como ao persoal docente e investigador. Tamén en colaboración coas tres universidades, organizáronse cursos de verán de lingua e cultura galegas para estranxeiros nos que participaron alumnos e alumnas de países de todo o mundo.
CiberLabFP configúrase como un espazo de aprendizaxe, experimentación e desenvolvemento de competencias en contornos reais que integran tecnoloxías da información (IT) e de operación (OT) para así adaptar a Formación Profesional aos novos escenarios de transformación dixital. Entre as súas funcionalidades destacan a formación especializada do profesorado, a simulación de ciberataques e defensa en contornos virtuais, a análise forense industrial ou a validación de sistemas. Ademais, contará cunha estación móbil que permitirá levar a tecnoloxía a centros educativos e realizar demostracións en empresas e feiras.
Celebrouse hoxe a sesión constitutiva do Foro do Litoral de Galicia, que será o máximo órgano colexiado de consulta e participación do conxunto da sociedade co fin de optimizar a xestión e ordenación da costa galega. Nel están representadas a Administración autonómica e as locais así como os sectores social, científico, económico e medioambiental e as entidades implicadas na protección do patrimonio natural co fin último de garantir unha gobernanza que permita unha participación suficiente de todos os sectores da sociedade interesados no litoral. A constitución do foro facilitará a partir de agora facer un seguimento das normas, políticas e instrumentos do litoral.
