miércoles, 12 de agosto de 2026
A Consellería do Medio Rural, a través do Fondo Galego de Garantía Agraria (FOGGA), ordenou a transferencia de 8.185.752 euros en materia de indemnizacións compensatorias, correspondentes á campaña 2010, a 6.130 agricultores de zonas desfavorecidas.
As axudas, no marco do Programa de Desenvolvemento Rural de Galicia para o período 2007-2013, teñen por obxectivo indemnizar aos agricultores que desenvolven a súa actividade en zonas con desvantaxes naturais polos custos adicionais e as perdas de ingresos derivados das dificultades que plantexa a produción agrícola nesas zonas. Preténdese favorecer o uso continuado das terras agrícolas, contribuíndo ao mantemento dunha comunidade rural viable que posibilite a conservación do campo.
Estes pagos, correspondentes a solicitudes presentadas entre o 1 de febreiro e o 14 de maio de 2010, realízanse despois de que o FOGGA fixera os controis administrativos e sobre o terreo establecidos para a comprobación do cumprimento dos compromisos asumidos polos agricultores.
Distribución provincial
A axuda mínima por explotación é de 300 euros e a máxima de 2500 . Na distribución provincial do importe das axudas pagadas, un 9.34% corresponden á provincia de A Coruña, un 71,85 % á de Lugo, un 11,65% á de Ourense e un 7,16 % á de Pontevedra. Estas axudas están cofinanciadas nun 57,56 % polo Fondo Europeo Agrario de Desenvolvemento Rural (FEADER) e o resto a partes iguais pola Comunidade Autónoma, a través do Departamento que dirixe Samuel Juárez, e pola Administración Xeral do Estado.
Axudas directas da PAC
Estes pagos súmanse aos efectuados recentemente e que corresponden a varias axudas directas da Política Agraria Común, coa transferencia, en días pasados, de 69.724.182 euros que beneficiaron a 52.460 gandeiros. Esta cifra, sumada aos 44.236.624 euros pagados no mes de outubro como anticipo, supón un total de 113.960.806 euros que ten recibido o sector como axudas directas á agricultura e á gandería solicitadas neste ano e financiadas polo Fondo Europeo Agrario de Garantía (FEAGA).
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
