jueves, 13 de agosto de 2026
Celebra, Salón de Vodas, Comuñóns e Bautizos e Actos Sociais, chega a súa 11ª edición conseguindo a involucración e a participación activa, a través do seu comité organizador, dos representantes das principais entidades que engloban aos comerciantes como é o caso da Comisión de Comercio Interior da Cámara de Comercio de Ourense, representada polo seu presidente, Luis Rivera; pola Federación de Comercio de Ourense, encabezada polo seu presidente Aurelio Gómez Villar; e da Federación Provincial de Empresarios de Hostalería, do Centro Comercial Aberto de Ourense e o do Barco de Valdeorras, ademais doutras empresas provedoras de produtos e servizos que xa levan moitas edicións apostando por esta cita.
O comité organizador de Celebra, que terá lugar en Expourense na fin de semana do 6 e 7 de novembro, reuniuse co obxectivo de planificar a vindeira edición do salón. Todas estas entidades, conscientes da difícil situación actual pola que atravesa o sector, ven en Celebra unha oportunidade para reactivar o comercio minorista nunha cita á que acode público obxectivo na busca dos produtos e servizos que estás ofrecen para organizar calquera tipo de eventos, tanto familiares como empresariais, cos que dar resposta á complexa planificación de actos sociais como vodas, comuñóns, bautizos, etc. O obxectivo é que o 100% das empresas expositoras sexan procedentes de Galicia.
Unha decena de sectores estarán presentes en Celebra, salón no que se atopará unha nutrida oferta en restauración e o catering, en moda para cerimonias, en fotografía e vídeo, viaxes ou animación e espectáculos. Tamén terán o seu espazo as empresas de aluguer de vehículos, imprenta, florerías, perruquería ou medios de comunicación. Haberá ademais empresas especializadas na organización integral de eventos, co que o visitante non só poderá coñecer as últimas novidades en servizos e produtos, senón que poderá recibir asesoramento e novas ideas para o seu evento.
Programa de actividades
Para complementar a oferta en feira, organizáronse unha serie de actividades orientadas a facilitar aos visitantes a elección do estilo e vestimenta axeitada para ocasións especiais polo que non faltará a tradicional pasarela Celebra, actuacións, sorteos, entre outras sorpresas.
Convenio coa Cámara de Comercio
Esta cita servirá ademais para darlle continuidade ó convenio de colaboración que a Fundación mantén coa Cámara de Comercio de Ourense, e a través do cal haberá en Celebra espazo reservado para autónomos e microempresas. O obxectivo é favorecer a promoción e o desenvolvemento económico daquelas empresas da provincia que, polas súas características, non poden destinar recursos para a asistencia a feiras.
Celebra convértese así nunha cita onde a presenza de todo tipo de empresas permitelle ó visitante dispoñer dunha oferta integral que engloba todos os produtos e servizos que demandarán os seus eventos.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
