jueves, 13 de agosto de 2026
O conselleiro de Economía e Industria, Javier Guerra, presidiu o Pleno do Consello Galego de Cámaras para a elección do seu presidente e comité executivo que pon o punto e final aos procesos electorais que completan o proceso de renovación das nove cámaras de comercio de Galicia acometido nas últimas semanas.
Javier Guerra trasladou aos presidentes das nove cámaras de comercio galegas e ao novo presidente do Consello Galego de Cámaras, José García Costas, e ao seu equipo os seus parabéns polo proceso electoral e emprazounos a enfrontar con ilusión e con novos retos esta nova etapa, na que hai que levar a cabo unha xestión moderna, áxil, eficaz e próxima ao cidadán para contribuír ao desenvolvemento económico dos sectores produtivos clave para Galicia.
O conselleiro de Economía e Industria apuntou que as cámaras de comercio galegas son aliadas necesarias para a recuperación económica de Galicia, posto que se configuran como ferramentas útiles na xestión e no desenvolvemento das nosas empresas nas súas diferentes etapas de creación, expansión e desenvolvemento.
Javier Guerra destacou tamén a vital importancia da función do Consello Galego de Cámaras como representación da voz unánime das novas cámaras e como interlocutor válido e necesario coa Administración. Por este motivo, salientou, dende a Consellería de Eocnomía e Industria poñémonos a súa disposición para establecer as vías de colaboración que nos leven a encamiñar as iniciativas que xurdan das cámaras e aproveitar todos os instrumentos ao noso alcance para lograr unha cooperación que repercuta dun xeito beneficioso no tecido empresarial e na súa competitividade.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
