jueves, 13 de agosto de 2026
Navalia acolle o xoves 20 de maio, a partir das 17,30 unha xornada informativa específica destinada a explicar aos empresarios as novas liñas de axuda habilitadas pola Consellería de Economía e Industria a través do Instituto Galego de Promoción Económica (Igape), no marco do Plan re-Forza 2010.
Técnicos e directivos do instituto que preside o conselleiro Javier Guerra serán os encargados de debullar as novidades normativas en vigor para apoiar iniciativas de internacionalización empresarial, proxectos de investimento ou actuacións orientadas á impulsar a mellora da competitividade das empresas galegas.
Esta xornada informativa sobre o novo marco de apoio aos proxectos empresariais habilitado no marco do Plan re-Forza 2010 desenvolverase no espazo expositivo da Consellería de Economía e Industria en Navalia (no IFEVI, en Vigo).
O relatorio sobre os obxectivos do Plan re-Forza 2010 e a clausura correrá por conta do director xeral do Igape, Joaquín Varela de Limia, e será a partir das 18,30 horas. O Plan re-Forza ten entre os seus obxectivos fundamentais os destinados a acadar unha maior competitividade das empresas galegas, favorecer a súa internacionalización e axilizar ao máximo o tempo de resposta ás solicitudes de apoio dos empresarios, para que as axudas podan ser realmente efectivas.
Desde o pasado día 18, o Igape dispón dun equipo técnico permanente no espazo expositivo da Consellería de Economía e Industria en Navalia para asesorar e orientar aos empresarios e profesionais visitantes sobre todas as novidades dos programas de axudas e servizos do Igape.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
