jueves, 13 de agosto de 2026
Dende o momento de dar os primeiros pasos ata a internacionalización como segunda oportunidade de emprendemento. As distintas actividades incluídas no programa do Día do Emprendedor, que están a ultimar o Instituto Galego de Promoción Económica (Igape) e BIC Galicia, organismos dependentes da Consellería de Economía e Industria, van orientadas a axudar a desenvolver a creatividade empresarial a través da análise e o traballo práctico en elementos como o financiamento, a formación directiva ou as novas formas de marqueting e vendas. Ademais, como novidade, este ano existirán espazos específicos onde os potenciais emprendedores poderán presentar ideas para conseguir asesoramento ou investimento. O encontro desenvolverase en Santiago de Compostela o 16 de xuño.
O principal obxectivo desta xornada multitudinaria, promovida pola Consellería de Economía e Industria do Goberno galego conxuntamente co Ministerio de Industria, Turismo y Comercio, é ser de verdadeira utilidade para os emprendedores, tanto para aqueles que teñen un proxecto e precisan de apoio para poñelo en marcha, como para aqueles outros que buscan segundas oportunidades para facer crecer o seu negocio. Na edición de 2010, a quinta da iniciativa Emprendemos juntos promovida a nivel estatal polo MITyC, en Galicia farase fincapé no financiamento e na eficiencia empresarial, pero tamén na creatividade, no coñecemento e na tecnoloxía como claves para sacar adiante, en tempos de crise, unha idea de negocio con futuro.
Por primeira vez, para a edición deste ano utilizaranse as redes sociais e impulsarase a xornada como un espazo que favoreza o networking. Ademais, provocarase o encontro entre as ideas emprendedoras e os posibles investidores así como un punto específico de xuntanza para aqueles empresarios con necesidades comúns.
Cinco liñas temáticas
Dende un punto de vista moi práctico, no Día do Emprendedor de Galicia haberá lugar para o desenvolvemento de accións encadradas en cinco liñas temáticas. Abordaranse os negocios tecnolóxicos tanto como un medio para facer crecer o proxecto como na súa consideración como interesante nicho de mercado; as posibilidades que ofrecen as franquías; as novas oportunidades para emprender; o acceso ao financiamento como factor clave; e a internacionalización como segunda oportunidade para o emprendemento.
Paralelamente, terá lugar a xornada Iniciador Galicia que acollerá a presentación de startups galegas diante de investidores, co obxectivo de atraer o seu interese; Iniciador Galicia é unha comunidade de emprendedores que ten como obxectivo fomentar e facilitar a emprendizaxe mediante actividades de emprendedores para emprendedores, onde se comparten coñecemento e experiencias.
Para cada unha das liñas vertebradoras do Día do Emprendedor haberá actividades de debate en forma de obradoiros e mesas redondas, espazos para entrevistas e asesoramento cara a cara e zonas habilitadas para exposicións temáticas sobre contidos como a innovación, o financiamento, a formación, a tecnoloxía, os viveiros de empresa e a internacionalización empresarial. As inscricións para participar en calquera dos eventos programados, sempre de carácter gratuíto, deben facerse a través da web do Día do Emprendedor de Galicia: http://www.diaemprendedor.com/
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
