jueves, 13 de agosto de 2026
A secretaría xeral para o Turismo, Mª Carmen Pardo López, presentou a nova central de reservas de turismo rural de Galicia da Sociedade de Imaxe e Promoción Turística de Galicia (Turgalicia), á que se adheriron xa un total de 194 casas de turismo rural en menos dun mes de funcionamento desta nova ferramenta, sobrepasando así o obxectivo marcado dun cento de casas. O número de casas que se podían reservar on line a través da antiga central de reservas era tan só de 20.
A nova central, que pasou, segundo explicou a secretaria xeral, do anterior sistema de reserva telefónico ao on-line, estará a disposición de múltiples usuarios, en calquera parte do mundo, tanto por parte do cliente final como por parte das axencias. Así, o incremento do número de idiomas nos que se pode consultar a plataforma (oito en total) facilitan a realización da reserva sen problemas.
Trátase dun módulo funcional e operativo que permite estar conectado directamente con 1.800 operadores turísticos e cuns 18.800 puntos de venda final, dos que 7.000 son españois, 6.000 son alemáns, 4.000 son italianos e 1.800 son portugueses.
Novidades
A nova central de reservas funciona como multipasarela de pagos, en contraposición coa antiga, que carecía deste sistema. O software actual permite tamén a posibilidade de confeccionar paquetes turísticos e comercializalos a través da plataforma, así como a posibilidade de realizar vendas cruzadas doutros servizos turísticos que sexan de interese para o turista que realiza a reserva nalgún dos aloxamentos rurais dispoñibles. Ademais este novo software tamén se actualiza a medida que varían as necesidades e os mercados turísticos, polo que se espera que isto redunde nun aumento das reservas e mellore a ocupación e a desestacionalización do turismo rural.
A ferramenta permitirá obter automaticamente datos estatísticos que axudarán a coñecer a evolución do sector facilitando os traballos de planificación e contraste das políticas de promoción turística. Case 340 casas de turismo rural xa teñen implantado o software e están en fase de formación para unha posterior adhesión á central.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
