Notas de prensa

Sexo? Por que non? abre a programación de maio

A montaxe da compañía galega EME2 Emoción&Arte Sexo? Por que non? inicia a programación de maio do Salón Teatro de Santiago de Compostela como primeira entrega dunha variada carteleira que dá cabida a un total de seis funcións teatrais e dous concertos. O espazo que xestiona o Centro Dramático Galego (CDG) acollerá tamén as últimas proposta escénicas dos grupos madrileños Kamikaze e K Producciones, a música en directo de Vashti Bunyan e Lorena Lores, a proxección de varias curtas dentro do festival Curtocircuíto e o inicio da Mostra Internacional de Teatro Universitario.

Con Mercedes Castro sobre as táboas e baixo a dirección de �lvaro Lavín, Sexo? Por que non? é unha divertida comedia que amosa situacións cotiás en torno ao encontro carnal e ao pouco que del sabemos na sociedade occidental. O espectáculo -do que se desenvolverán dúas funcións o sábado 8 e o domingo 9- pregúntase por que, se o sexo é algo tan central nas nosas vidas, xa que case nunca falamos del máis que desde os complexos e os estereotipos, e faino fuxindo do chiste fácil e do bombardeo pornográfico.

Días despois (22 e 23 de maio), a compañía madrileña Kamikaze Producciones presentará a súa primeira produción teatral, La función por hacer, unha adaptación libre de Miguel del Arco e Aitor Tejada da obra de Luigi Pirandello Seis personaxes en busca de autor. A montaxe, pasa por ser unha das revelacións da actual temporada a nivel estatal, desenvolve unha posta en escena moi especial na que se sitúa en primeiro plano a interacción coas únicas 80 persoas que conforman todo o público posible en cada pase.

A violencia nas aulas

O sábado 29 e o domingo 30 será a quenda da montaxe de K Producciones La charca inútil, escrita por David Desola e dirixida por Roberto Cerdá. O texto, galardoado co Premio Lope de Vega de Teatro en 2007, é un drama sobre a violencia nas aulas onde os personaxes mostran o seu desencanto pola crúa realidade da sociedade actual. Adolfo Fernández, Sonia Almarcha e Miguel Palenzuela interpretan uns personaxes atormentados, víctimas dun entorno opresivo e dunha sociedade que escarba na dor allea.

Así mesmo, desenvolverase unha nova cita coa música de vangarda inserida na programación da extensión en Santiago do Festival Sinsal. Deste xeito, o mércores 12 o Salón Teatro acollerá o concerto da cantautora Vashti Bunyan na súa volta aos escenarios despois de trinta anos, despois de voltar aos estudos de gravación arroupada por unha nova xeración de músicos interesados no folk como Devendra Banhart ou Joanna Newsom.

Ademais, o xoves 20 terá lugar a actuación da cantante galego-arxentina Lorena Lores, que presentará Dúas Beiras, un espectáculo no que, por medio da música e da danza, amosa a cultura das dúas beiras do Atlántico, a galega e a riopratense, e o enriquecemento producido polo encontro de ambas como froito da emigración. No concerto conxuga cancións tradicionais galegas, outras da súa autoría, tangos e cancións do folclore arxentino.

O Salón Teatro converterase do luns 24 ao xoves 27 en sala de cinema para acoller parte das proxeccións do Festival Internacional de Curtametraxes Curtocircuíto que, organizado pola Concellería de Cultura de Santiago, ofrecerá varias sesións diarias. Finalmente, como en anos anteriores, o Centro Dramático Galego (CDG) cederá o seu escenario para a celebración da Mostra Internacional de Teatro Universitario da USC (Universidade de Santiago de Compostela) que terá lugar entre o luns 31 de maio e o domingo 6 de xuño.

As entradas para asistir aos espectáculos poranse á venda no despacho de billetes do Salón Teatro desde dúas horas antes do seu comezo. Tamén se poderán adquirir na billeteira electrónica a través do teléfono 902 43 44 43 ou da web www.caixagalicia.es. O prezo das localidades é de 10 euros, cun desconto do 40% para estudantes, xubilados, usuarios do carné xoven e desempregados.