jueves, 13 de agosto de 2026
O conselleiro de Economía e Industria, Javier Guerra, asinou un convenio de colaboración coas compañías de distribución eléctrica para apoiar o desenvolvemento de plans de mellora da calidade do servizo e subministración eléctrica, de control de tensión e de limpeza de marxes das liñas na Comunidade Autónoma de Galicia.
Segundo o establecido neste acordo, a Xunta de Galicia, a través da Consellería de Economía e Industria, financiará con 2,53 millóns de euros a mellora da prestación do servizo eléctrico en Galicia, co que se xerará un investimento de máis de 24,17 millóns de euros.
Neste convenio contémplase a realización global de case 260 actuacións en máis de 200 concellos galegos espallados polas catro provincias, o que supón un notable incremento con respecto ás obras levadas a cabo no periodo anterior, e que únicamente abrangueron 182 accións de mellora neste eido.
Entre as obras, que teñen un beneficio potencial para máis dun millón de galegos, están incluídas as máis de 166 dos plans de mellora do servizo eléctrico, as 30 accións pertencentes aos plans de control da tensión, e as 63 de limpeza das marxes polas que discorren as liñas. Este acordo deriva do convenio marco xa autorizado co Ministerio de Industria, Turismo e Comercio.
O convenio de colaboración entre o departamento que dirixe Javier Guerra Fernández e as empresas distribuidoras de enerxía eléctrica para a mellora da calidade da subministración de enerxía eléctrica en Galicia para o ano 2010, enmárcase dentro dun plan cun horizonte temporal no ano 2013 e que se materializará nos vindeiros anos en próximos convenios de colaboración.
Ao abeiro deste convenio, asinado hoxe polo conselleiro de Economía e Industria e os representantes das distintas compañías, máis de 200 concellos da comunidade se verán beneficiados pola posta en marcha de iniciativas de mellora do servizo eléctrico, unha iniciativa orientada fundamentalmente de cara aos municipios rurais.
Javier Guerra lembrou que o Goberno galego traballa para impulsar melloras que aumenten a calidade das infraestructuras e servizos, e polo tanto a calidade de vida en todos os concellos de Galicia.
Segundo o conselleiro de Economía e Industria, é fundamental incentivar a mellora da calidade dos servizos eléctricos que as compañías prestan aos Galegos para asegurar o axeitado desenvolvemento das nosas vilas e cidades e o respecto aos dereitos dos consumidores, garantindo a mellora continuada dos servizos de subministro enerxético.
No acto de sinatura estiveron presentes, ademais do conselleiro de Economía e Industria, o conselleiro delegado de Gas Natural/Unión Fenosa, Rafael Villaseca; o presidente de Begasa, Miguel Antoñanzas Alvear; o presidente da Asociación de Produtores e Distribuidores de Enerxía de Galicia, que engloba a numerosas empresas de toda a Comunidade Autónoma, José Manuel Arufe Rieiro; e Ignacio Suárez Garin en representación de Endesa, entre outros.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
