jueves, 13 de agosto de 2026
En resposta a unha pregunta da deputada do BNG, Olaia Fernández Davila, o secretario de Estado de Medio Rural, Josep Puxeu, recoñeceu que os contratos homologados no sector lácteo apenas cobren o 20% da produción láctea no Estado español.
O representante do Ministerio de Medio Rural comparecía esta tarde en Comisión no Congreso dos Deputados para responder a unha pregunta da deputada do BNG sobre a valoración dos resultados dos acordos de xullo de 2009 entre Goberno, industria láctea e organizacións agrarias. Na súa exposición, Davila criticou que os resultados son máis ben escasos tanto no número de contratos homologados asinados como na evolucións dos prezos do leite. Así, subliñou que no caso de Galiza o número de contratos asinados é de pouco máis de 1.000 sobre un total de 12.000 explotacións, e todos pola mesma industria láctea. E no caso dos prezos considerou que tampouco foi moi positiva e evolución xa que se en xullo de 2009 o prezo anda sobre os 0,27 euros por litro, agora a media do Estado está en 0,31 pero en Galiza segue nos 0,26/0,27 por litro, uns prezos que non lles cobren aos gandeiros e gandeiras os custos de produción.
Ademais, a deputada do BNG criticou que pouco sabemos se o Goberno cumpriu os acordos parlamentarios, acadados mesmo co apio do PSOE, para que o Goberno adopte medidas na Unión Europea para evitar a especulación nos mercados lácteos; para garantir unhas rendas dignas aos produtores, para controlar os intercambios no seo da UE ou para seguir a evolución do mercado.
Inminente saída do Decreto que regula a etiqueta de trazabilidade
Na súa resposta o representante do Goberno asegurou que a UE destinou este ano 800 millóns de euros de apoio ao sector lácteo, mentres que no Estado español a cifra elevouse a uns 320 millóns de euros. Respecto aos prezos Josep Puxeu asegurou que se incrementaron nun 13% respecto a xullo de 2009, aínda que sen informar do caso concreto de Galiza.
No tocante aos contratos homologados, limitouse a informar de que cobren arredor do 20% da produción láctea do Estado español, pero sen concretar e asegurou que o os prezos destes contratos serven de referencia para o 80% restante. Porén, non respondeu ás preguntas da deputada do BNG sobre se marcan os prezos á baixa e porqué non se asinan máis.
Por último, o secretario de Estado de Medio Rural anunciou que en breve publicarase o Decreto de Etiquetado Facultativo da Leite e Produtos Lácteos coa letra Q de trazabilidade, unha norma que actualmente se atopa en fase de consultas no Consello de Estado.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
