jueves, 13 de agosto de 2026
A directora xeral de Innovación e Industrias Agrarias e Forestais da Consellería do Medio Rural, Alejandra Álvarez de Mon, recibiú a unha delegación da Indicación Xeográfica Protexida (IXP) Lacón Galego, co seu presidente, Luis Corujo Díaz, á cabeza. O obxectivo desta reunión de traballo foi o de deseñar unha estratexia conxunta para promover e potenciar este senlleiro produto galego con distintivo de calidade.
Os representantes de Lacón Galego explicaron á directora xeral a evolución e situación actual da IXP, e trasladaron as súas impresións sobre as accións a desenvolver no futuro entre o propio Consello Regulador e a Consellería do Medio Rural en materia de promoción e difusión deste produto nos diferentes mercados.
En toda Galicia existen actualmente un total de 214 explotacións de Lacón Galego e 39 industrias cárnicas e matadoiros. A produción amparada por esta Indicación Xeográfica Protexida alcanzou en 2008 os 34.583 quilos (cun total de 9.760 pezas). O valor económico estimado desta produción foi de 146.792 euros.
O lacón galego está recoñecido como denominación específica dende o 7 de febreiro de 1997. A zona de produción e elaboración comprende todo o territorio da Comunidade Autónoma galega. A IXP protexe as extremidades dianteiras do gando porcino tradicionalmente designadas co nome de lacón, una vez curadas.
O proceso de elaboración do lacón consta de varias fases (salgadura, lavado, asentado e secado ou curado), cunha duración mínima de 30 días.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
