jueves, 13 de agosto de 2026
A Consellería de Economía e Industria colga na súa páxina web 12 artigos que modifican a Lei 10/1988, do 20 de xullo, de ordenación do comercio interior de Galicia para a súa exposición ao público -cun periodo de alegacións de dez días antes da súa tramitación para a aprobación definitiva-, e que atinxen expresamente aos artigos relativos á segunda licenza das grandes superficies e permitirán á Dirección Xeral de Comercio acadar a transposición en prazo da Directiva de Servizo Europea, antes do 28 de decembro.
Estas modificacións do articulado teñen o obxectivo de evitar os efectos directos da falla de transposición en prazo da Directiva, asegurando en todo momento unha normativa reguladora da materia, sobre todo no que atinxe aos establecementos cunha superficie superior aos 2.500 metros cadrados, evitando deixar marxe de maniobra para que se presenten solicitudes de implantación de grandes superficies sin ter que acollerse á normativa vixente ata o de agora e á prevista no borrador da nova Lei de Comercio Interior de Galicia.
Cumprindo coas directrices que marca a Directiva de Servizos, as modificacións colgadas na páxina web fan referencia ao emprego de criterios urbanísticos e xerais para as autorizacións de establecementos de máis de 2.500 metros cadrados, e varían a comisión de equipamentos para transformala na comisión interadministrativa.
Así, para os efectos de transposición da Directiva de Servizos, a Consellería de Economía e Industria, a través da Dirección Xeral de Comercio, ten dous procesos lexislativos abertos para cumprir. Por un lado, a modificación da Lei 10/1988 de Ordenación do Comercio Interior de Galicia, e por outro a elaboración dunha nova Lei de Comercio de Galicia, que será presentada proximamente e que, segundo as mellores previsións do departamento, podería estar aprobada no vindeiro mes de marzo.
O novo borrador da Lei de Comercio de Galicia, na que a Dirección Xeral de Comercio leva traballando dende o inicio do mandato do novo Goberno da Xunta de Galicia, vai ser froito do consenso, como demostran actuacións como o Foro do Comercio, e a participación activa dos propios axentes implicados no comercio galego.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
