Notas de prensa

198 marcas de todas as denominacións de orixe participaron na XXI Cata de Viños de Galicia 2009

O presidente da Xunta de Galicia, Alberto Núñez Feijóo, loou, na entrega de premios da ‘Cata de viños de Galicia 2009’, o traballo do sector vinícola galego, ‘cuxo esforzo e dedicación –dixo- fan que os viños e augardentes galegos de calidade estean a resistir cun modélico pulo o impacto da crise’.

Ao longo da súa intervención, Feijóo asegurou que este sector é un exemplo de que a calidade e a excelencia ‘sempre pagan a pena’. ‘Nun tempo de crise coma este, -subliñou- persoas coma vós, que identificades o voso traballo coa excelencia e a Galicia coa calidade, é o que precisa o país’.

Neste sentido, o mandatario galego asegurou que non hai mellores mestres en Galicia do que significa tomarse moi en serio a promoción desta terra no exterior, ‘como demostra o feito de que, mentres hoxe gozamos dun bo viño, os adegueiros en Australia non atopan albariño na súa uva’.

Para Feijóo, ese feito, que a súa uva non sexa de albariño puro, permitirá que a auténtica uva do albariño substitúa nos estantes o espazo que arestora ocupan viños australianos de alta calidade pero que, ‘mal que lles pese, non son feitos con uva de albariño’.

O presidente do Executivo autonómico animou ao sector a seguir por este camiño, ‘polo vieiro da promoción de Galicia e do bo facer’. ‘O voso traballo –subliñou- é sinónimo de calidade en todo o mundo. A vosa dedicación e esmero supón un expoñente do traballo ben feito, do tesón pola mellora continua e das gañas por transmitir ás xeracións vindeiras aínda máis sabedoría da que temos herdado dos devanceiros’.

198 marcas de viños de todas as denominacións de orixe

A XXI edición da Cata estivo composta por tres concursos -XXI Cata dos Viños de Galicia, a XI Cata das Augardentes de Galicia e o VIII Concurso de Deseño e Presentación de Viños e Augardentes-; e nela participaron 198 marcas de viños de todas as denominacións de orixe: 61 viños brancos e tintos da D.O. Rías Baixas, 48 da D.O. Ribeiro, 39 da D.O. Valdeorras, 28 da D.O. Ribeira Sacra e 22 da D.O. Monterrei.