Notas de prensa

A Xunta e as empresas das TIC colaborarán para crear o Clúster do sector

A secretaria xeral de Modernización e Innovación Tecnolóxica, Mar Pereira, reuniuse co Consello Territorial galego da patronal ASIMELEC (Asociación Multisectorial de Empresas de Tecnologías de la Información, Comunicaciones y Electrónica), logo de que este Consello celebrase a súa constitución formal.

A delegación de ASIMELEC en Galicia está presidida polo empresario José Ramón García, director de Blusens. Tras congratularse pola creación do organismo, a secretaria xeral suliñou que “unha idea por si mesma non é suficiente, un líder con visión de futuro e un bo equipo son os que fan posible o éxito”. Mar Pereira apostou polo diálogo “directo e continuo” entre a Xunta e o empresariado do sector “para orientar axeitadamente as políticas tecnolóxicas”.

A presenza da secretaria xeral, cuxo departamento depende directamente do presidente da Xunta de Galicia, Alberto Núñez Feijóo da idea do compromiso do goberno autonómico co sector das Tecnoloxías da Información e Comunicación (TIC). A propia Mar Pereira encargouse de recalcalo durante o acto, afirmando que, no tocante ás TIC “a Xunta debe xogar un liderado real e executivo, que se materializa a través dun organismo único, integrador, coordinador e responsable”.

Dende este organismo (a Secretaría Xeral de Modernización e Innovación Tecnolóxica) Mar Pereira comprometeuse hoxe a impulsar e dinamizar o clúster TIC, coa convicción de que unha cooperación ben estruturada é un dos instrumentos fundamentais para mellorar a competitividade nas empresas e pór en marcha novos proxectos, especialmente nas pequenas e medianas empresas”.

É con respecto a esa competitividade para o que a secretaria xeral considera preciso que o seu departamento exerza “un liderado integrador”. Mar Pereira avogou por desterrar o individualismo e animou ás empresas a innovar”, engadindo que “temos que favorecer lugares de encontro entre as TIC e os diferentes ámbitos produtivos”.

Mar Pereira salientou como unha das súas prioridades “deseñar e por en marcha un plan efectivo de excelencia empresarial sustentado no desenvolvemento e impulso da innovación, a cooperación e a mellora formativa de empresarios e traballadores”.

O sector TIC galego está integrado por unha 1.500 empresas e xera máis de 13.000 postos de traballo na comunidade autónoma de Galicia. A facturación destas empresas supón en torno ao 2,15% do PIB galego.

ASIMELEC (Asociación Multisectorial de Empresas de Tecnologías de la Información, Comunicaciones y Electrónica) é unha patronal do sector das TIC nada en 1984. Hoxe en día agrupa tanto a fabricantes como a comercializadores, distribuidores e a instaladores de telecomunicacións. É a única asociación do macrosector TIC que agrupa a todos os sectores. Grazas a esta filosofía de multisectorialidade defende os intereses da totalidade do sector electrónico.

A asociación instalou hoxe en Galicia o seu quinto Consello Territorial, tralos de Cataluña, Asturias, Comunidade Valenciana e Andalucía, co obxectivo de fomentar o desenvolvemento de empresas de electrónica e comunicacións na comunidade autónoma.

ASIMELEC, integrada por empresas cuxa facturación en España supón arredor do 4’5% do PIB estatal, integrará en Galicia a asociacións previamente existentes como AGESTIC (Asociación Gallega de Tecnologías de Información y Comunicación), fundada en 2003 e presidida por José María López Bodrio, ou a AGEINTE, a rama galega de FENITEL (Federación Nacional de Instaladores de Telecomunicaciones).

De este modo, ASIMELEC constitúese desde hoxe, como rezan os seus estatutos, en interlocutor válido ante as instancias administrativas locais e autonómicas especialmente, polo tanto, da Secretaría Xeral de Modernización e Innovación Tecnolóxica.