viernes, 14 de agosto de 2026
O reitor da USC, Senén Barro, e o director rexional para a zona noroeste da empresa Tecnocom, Telecomunicacións e Enerxía, Santiago Cárdenas Botas, asinan en San Xerome un convenio marco que rexerá as futuras colaboracións que conxuntamente decidan emprender. Ao acto asistiron ademais o director da Escola Técnica Superior de Enxeñaría, Juan Manuel Lema, e outros responsables do centro.
Con esta iniciativa pretenden traballar na promoción do desenvolvemento da sociedade do coñecemento a través dunha formación especializada nas Tecnoloxías da Información (TIN), estimulando ademais o avance da formación universitaria mediante a adopción das últimas innovacións neste sector, ao tempo que tentarán achegar a formación dos futuros profesionais universitarios ás necesidades do mercado potenciando así a súa empregabilidade.
Para acadar estes obxectivos cooperarán no deseño dos programas de titulacións de grao e posgrao no ámbito das TIN e realizarán accións conxuntas que fomenten o uso de novas tecnoloxías e metodoloxías de desenvolvemento de proxectos por parte dos universitarios. Neste senso, Tecnocom colaborará coa Aula Profesional da Escola Técnica Superior de Enxeñaría impartindo formación complementaria aos estudantes. A este respecto, a empresa estuda a posibilidade de crear unha Aula Tecnocom con obxectivos similares á anteriormente citada.
Por outra banda, e co fin de formar profesionais creativos e innovadores, Tecnocom colaborará coa USC na formación de formadores en elementos innovadores de interese educativo.
Premio e bolsas de prácticas
No mesmo acto, ambas as dúas partes asinaron o primeiro convenio específico para o desenvolvemento dunha serie de iniciativas conxuntas encamiñadas á promoción do uso das TIN no ámbito docente e de investigación universitaria. Así, acordaron a convocatoria do Premio ao mellor Proxecto Fin de Carreira dotado con 1.500 euros na titulación de Enxeñaría Técnica en Informática de Sistemas. Ademais, Tecnocom ofertará entre unha e dez bolsas de formación profesional de tres meses de duración para recén titulados da USC.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
