viernes, 14 de agosto de 2026
O director-xerente da Sociedade de Imaxe e Promoción Turística de Galicia, Turgalicia, Xesús Pereira, e a presidenta da Federación Galega de Turismo Rural, Marisol Lorenzo, asinaron en Santiago un acordo de colaboración ao obxecto de buscar novas vías de comercialización do Turismo Rural de Galiza.
Por este acordo, Fegatur comprométese, entre outras accións, a elaborar novas propostas de paquetes turísticos para o Turismo Rural, así como un estudo de comercialización nos mercados estranxeiros Alemaña, Francia, Italia, Portugal e Gran Bretaña e deseñar estratexias de promoción específicas nestes mercados.
Ademais, Fegatur comprométese a cooperar coas outras asociacións do sector na realización de promocións e accións conxuntas a prol do Turismo Rural de Galiza, unificando as estratexias de promoción das asociacións a fin de conseguir unha maior rendibilidade e eficacia das mesmas
Novas tecnoloxías
Por outra parte, a federación de asociacións de Turismo Rural de Galiza comprométese a desenvolver un estudo referente ao emprego das novas tecnoloxías da información no ámbito da comercialización de aloxamentos rurais on line, así como á formación dos empresarios asociados nestas materias.
Pola súa parte, Turgalicia comprométese a achegar a cantidade de 40.000 euros para o desenvolvemento destas accións.
Ademais, Turgalicia comprométese a colaborar con Fegatur no deseño e execucións das accións previstas neste acordo, accións que serán dirixidas pola sociedade pública de promoción turística de Galiza.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
