viernes, 6 de noviembre de 2026
A Conselleira de Pesca e Asuntos Marítimos, Carmen Gallego Calvar, mantivo en San Caetano unha xuntanza de traballo co Alcalde de Nigrán, Efrén Juanes Rodríguez, e co Concelleiro de Urbanismo deste municipio pontevedrés, Juan González. Entre os temas que se abordaron no encontro destacan a instalación dunha cámara frigorífica no porto de Panxón, así como o apoio da Administración pesqueira galega á reforma da praza de abastos e á ampliación do dique de abrigo.
Deste xeito, Carmen Gallego trasladoulle ao rexedor de Nigrán que o seu departamento, a través das partidas recollidas nos orzamentos da Consellería de Pesca para o Plan de Infraestruturas Portuarias, procederá a instalar unha cámara frigorífica no porto de Panxón co obxectivo de que lle dea servizo ás aproximadamente 50 embarcacións que traballan na zona.
Ademais, a responsable da Administración pesqueira galega comprometeuse con Efrén Juanes a apoiar ao Concello ante o ente Portos de Galicia, dependente da Consellería de Política Territorial, na ampliación do dique de abrigo do porto de Panxón. Outra das cuestións tratadas na reunión foi a futura reforma da praza de abastos, que se está poñendo en marcha. Neste punto, a Conselleira trasladoulle ao Alcalde a colaboración do seu departamento para ese proxecto que se acometerá en breve.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
