viernes, 14 de agosto de 2026
O presidente da Xunta, Emilio Pérez Touriño, e os representantes da Confederación de Empresarios de Hostalería de Galicia, CEHOSGA, acordaron formalizar unha mesa de traballo permanente para debater sobre os desafíos e necesidades do sector e para incidir na formación dos empregados. O obxectivo desta iniciativa é apostar, entre outras medidas, tanto pola formación continua dos traballadores coma dos propios empresarios hostaleiros.
Así se acordou nun encontro mantido entre o titular do Goberno galego e a delegación de CEHOSGA, encabezada polo seu presidente, Juan Silva Alvite, no que tamén participaron representantes de asociacións de hostalería e restauración de Ourense, A Coruña, Santiago e comarca, Lugo, Pontevedra e Arousa. Na xuntanza, ambas as partes incidiron na necesidade de que haxa dirixentes ben preparados e tamén man de obra profesional e cualificada, cunha reciclaxe continua dos traballadores que levan tempo no sector da hostalería e achegan unha grande experiencia. A este respecto, os empresarios do sector da hostalería valoraron positivamente a existencia da formación profesional regrada neste eido.
Potenciar o turismo de congresos e de convencións
Durante a reunión, tanto Emilio Pérez Touriño como os representantes hostaleiros avogaron por potenciar o turismo de congresos e de convencións na comunidade galega. Neste obxectivo xa está a traballar o Goberno galego coa finalidade última de lograr desestacionalizar o turismo que chega ata Galicia e captar de xeito permanente novos clientes.
Durante o encontro desta mañá, tanto Emilio Pérez Touriño como os propios empresarios do sector coincidiron na necesidade de protexer e educar aos máis novos ante o consumo abusivo de alcohol. Ambos manifestaron a súa preocupación ante o fenómeno do botellón e consideraron que a educación é a clave para facerlle fronte a este problema.
Por último, o presidente da Xunta e os empresarios de CEHOSGA acordaron manter reunións periódicas e un diálogo permanente para abordar as necesidades e as preocupacións deste sector.
CEHOSGA
A Confederación de Empresarios de Hostalería de Galicia é unha entidade sen ánimo de lucro que ten entre os seus principais obxectivos a xestión, a defensa e a coordinación de intereses comúns dentro do sector hostaleiro e turístico galego. A confederación está integrada na propia Confederación de Empresarios de Galicia e forma parte do Consello de Turgalicia e da Comisión Sectorial de Hostalería e Turismo. A nivel estatal, está adherida aos máis importantes organismos hostaleiros, tales como a Federación Española de Hostalería e a Confederación Española de Aloxamentos e Hoteis Turísticos.
CEHOSGA está formada polas principais asociacións e federacións hostaleiras de Galicia. A confederación pretende, coa súa organización, dar unha axeitada cobertura aos seus asociados a través de diversos servizos de asesoramento, laboral, xurídico, fiscal, etc..., así como ciclos de formación e orientación laboral que melloren a produtividade e a calidade do sector.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
