domingo, 14 de junio de 2026
A Barbantesa é o título da exposición elaborada por profesorado e alumnado do IES Armando Cotarelo Valledor, de Vilagarcía de Arousa, para conmemorar o Día das Letras Galegas, que este ano se lle dedica a Xosé María Álvarez Blázquez. O proxecto foi elixido nun concurso convocado pola Secretaría Xeral de Política Lingüística para todos os centros de ensino de Galicia e consta de 11 carteis con ilustracións e outros tantos explicativos, así como cun caderno de actividades para o alumnado.
A exposición aborda a biografía de Álvarez Blázquez, a súa obra poética, a súa militancia, o seu labor como editor e as súas investigacións arqueolóxicas. O traballo, promovido polo Equipo de Normalización e Dinamización Lingüística do centro, contou coa participación dos departamentos de Música, Educación Plástica, Lingua e Literatura Galega, Física e Química, Bioloxía e Xeoloxía, e Xeografía e Historia. Precisamente, a convocatoria especificaba que o traballo debía ser interdepartamental e que na súa elaboración estarían incluídos un mínimo de cinco seminarios.
Ademais do profesorado, neste proxecto participaron tamén os alumnos integrantes do equipo de radio do Cotarelo Valledor.
Adaptación para primaria
O xurado, composto polos coordinadores territoriais dos equipos de normalización e dinamización lingüística e por persoal docente da Secretaría Xeral de Política Lingüística, acordou adaptar cinco dos carteis explicativos para a súa exposición nos centros de primaria. O Seminario Permanente de Formación do Profesorado do CEIP Galán, de Arteixo, elaborará unha unidade didáctica tamén destinada aos centros de Primaria.
A exposición gañadora, ademais de enviarse a todos os centros de ensino, será distribuída tamén en todos os concellos galegos, nos centros galegos do exterior, nos centros de estudos galegos das universidades de fóra de Galicia e noutros puntos de interese, como centros culturais, bibliotecas e entidades relacionadas co fomento da lingua galega. Máis de 2.500 puntos recibirán este material conmemorativo da festa das letras.
Este é o segundo ano que se convoca un concurso entre os centros de ensino de Galicia para a elaboración da exposición conmemorativa do Día das Letras Galegas. A convocatoria tivo moi boa acollida, superando amplamente o nivel de participación da edición anterior.
Foron presentados os novos equipamentos do Centro de Supercomputación de Galicia) instalación que vai incorporar un segundo computador cuántico, denominado IQM Spark. O novo supercomputador e os dous novos computadores cuánticos que se van adquirir situarán a nosa Comunidade na vangarda europea en canto a capacidade de almacenamento de datos e participación en grandes proxectos internacionais. En canto aos computadores cuánticos, o de menor capacidade (5 cúbits), dedicarase exclusivamente a tarefas de formación, probas de concepto e de algoritmia, complementando así ao de maior capacidade (54 cúbits), que será o buque insignia.
A Xunta exixe o rescate da AP-9 e asina cos Gobernos de Asturias e Castela e León e o tecido empresarial das tres comunidades a Declaración Compostela, que insta á Comisión Europea a culminar o ditame sobre as prórrogas da AP-9 e AP-66. A conselleira de Vivenda e Planificación de Infraestruturas, María Martínez Allegue, interveu no encontro 'As infraestruturas viarias do Noroeste', organizado pola Confederación de Empresarios de Galicia.
