viernes, 14 de agosto de 2026
O Consorcio Audiovisual de Galicia abre o prazo de presentación de solicitudes para formar parte da Bolsa de Emprego no Sector Audiovisual. Entre os servizos que proporcionará destaca a intermediación na procura de emprego por parte de desempregados e profesionais, e a busca de persoal cualificado por parte do empresariado do sector.
O programa articúlase a través da creación dunha bolsa de emprego que dará resposta ás peticións das empresas para cubrir os perfís profesionais demandados e aos traballadores e desempregados que procuran traballo. Ademais a bolsa oferta asesoramento laboral para a procura de emprego, orientación específica para estudantes e novos titulados e un servizo de alerta de novas, mediante a difusión de información relativa a cursos, tanto para solicitantes de emprego, como para emprendedores e empresarios que queiran mellorar a súa produtividade, a través do envío de información relacionada con axudas, subvencións e con proxectos de índole audiovisual.
O mercado de traballo neste sector presenta un elevado grao de especialización, así como un alto índice de rotación dos profesionais debido as modalidades de contratación. Así, a Bolsa, iniciativa pioneira na nosa comunidade, nace ao abeiro dunha subvención da consellería de Traballo para a implantación das políticas activas de emprego e coa finalidade de contribuír, dende o Consorcio, á creación de emprego no sector audiovisual galego.
Asesoramento laboral
Ademais de axudar aos demandantes a atopar emprego, ofrecerase asesoramento laboral e orientación sobre as diferentes posibilidades de atopar emprego, dos servizos e instrumentos máis adecuados para a súa procura, así como información sobre cursos e actividades de formación e reciclaxe para profesionais.
Na liña de dinamización e fomento do tecido empresarial galego, ofrécese un servizo de información actualizada sobre axudas e subvencións e o acceso a elas, así como de trámites para a posta en marcha de iniciativas de autoemprego.
Destinatarios
A Bolsa vai destinada principalmente, aos desempregados con interese en atopar emprego no sector, así como ás empresas e entidades que soliciten candidatos para cubrir os postos de traballo ou estean interesados en recibir información.
Procedemento de inscrición
A inscrición no servizo é de carácter gratuíto e pode realizarse ao longo de todo o ano. No caso dos candidatos, deberán cubrir o formulario de inscrición na base de datos e presentalo conxuntamente co currículo e unha fotografía. Opcionalmente poderán enviarse mostras de traballos anteriores e materiais multimedia en formatos estándar.
As empresas deberán remitir o formulario de inscrición na base de datos para proceder á alta no servizo, e un formulario de demanda de persoal cada vez que soliciten candidatos.
Tódolos formularios pódense conseguir na sede do Consorcio ou descargalos da súa páxina web (http://www.consorcioaudiovisualdegalicia.org), e pódense presentar tanto presencialmente como a través de correo electrónico ou fax.
Funcionamento
O Consorcio exercerá de intermediario na tramitación das demandas de profesionais, realizando unha preselección de currículos en función do/s perfil/ís solicitado/s e consultando cos candidatos a súa dispoñibilidade. A selección final dos currículos levarase a cabo pola empresa ofertante.
Aquelas persoas interesadas poderán obter máis información na páxina web do Consorcio (www.consorcioaudiovisualdegalicia.org), no enderezo de correo electrónico orientacion@consorcioaudiovisualdegalicia.org ou no teléfono 981.957.182.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
