Notas de prensa

Pesca publica a orde pola que regula o uso e xestión da reserva mariña de interese pesqueiro Os Miñarzos

O Diario Oficial de Galicia (DOG) publica hoxe a Orde do 27 de novembro de 2007, pola que se regula o uso e xestión da Reserva Mariña de Interese Pesqueiro “Os Miñarzos” de Lira. Este texto normativo recolle cuestións relativas á elaboración e revisión dun censo de embarcacións; ás actividades permitidas dentro da reserva; e ao seguimento científico e de divulgación desta área protexida. Ademais, regula o nomeamento dos membros do órgano de xestión, seguimento e control, así como o seu funcionamento e a súa sede.

Esta Orde, que entra en vigor mañá mesmo, dá continuidade ao proceso de creación da Reserva “Os Miñarzos”, impulsada pola Consellería de Pesca e a Confraría de Pescadores de Lira, que se iniciou coa publicación no DOG, o pasado mes maio, do Decreto 87/2007 polo que se creou esta área protexida e tras a súa aprobación polo Goberno galego. Posteriormente, constituíse o Órgano de Xestión, Seguimento e Control da reserva.

A Orde que recolle o DOG de hoxe trata de desenvolver aqueles aspectos procedementais necesarios para o bo fin do obxecto da reserva: a recuperación dos recursos pesqueiros e dos seus ecosistemas, así como para o correcto seguimento da súa evolución. Deste xeito, un dos aspectos nos que se incide é a sinalización da área protexida, cuxos límites serán balizados adecuadamente pola Consellería de Pesca e Asuntos Marítimos.

Así mesmo, regula o funcionamento do Órgano de Xestión, Seguimento e Control, adscrito á Dirección Xeral de Recursos Mariños, que terá a súa base no Porto de Lira e do que formarán parte, en representación do sector pesqueiro, dous membros propostos pola Confraría de Pescadores de Lira e outros dous designados pola Federación Galega de Confrarías. Pola súa banda, en representación da Consellería de Pesca participan tres integrantes e outro máis da Consellería de Medio Ambiente, tal e como xa establecía o decreto polo que se creou a Reserva Mariña de Lira. Este órgano rector reunirase en réxime ordinario dúas veces ao ano, preferentemente nos meses de marzo e outubro, e cantas veces propoña o seu presidente ou o soliciten tres dos seus membros.

Entre as funcións asignadas ao Órgano de Xestión, Seguimento e Control estarán supervisar e coordinar as actividades do persoal destinado ao seguimento da reserva; emitir informes no procedemento de elaboración e actualización do censo de embarcacións que poden faenar nesta área protexida; aprobar o plan anual de actuacións; e informar do programa de seguimento científico da reserva con anterioridade á súa aprobación. Ademais, proporá a realización de actividades de formación, información e divulgación deste espazo, así como propostas de modificación da normativa e condicións de uso da reserva e elevará informes anuais sobre a situación desta área e a súa evolución.

Elaboración e revisión do censo

Para a creación do censo de embarcacións que poden pescar na Reserva Mariña de Interese Pesqueiro “Os Miñarzos”, a Consellería de Pesca publicará, nos vindeiros días, unha resolución no DOG tras a que se abrirá un período de solicitude de inclusión durante o prazo dun mes. No caso de que o número de solicitudes sexa excesivo, en relación coa capacidade produtiva da área protexida, terase en conta como criterio de selección a pertenza a portos base máis próximos ao ámbito xeográfico da reserva.

Unha vez se elabore o censo provisional será publicado tamén no Diario Oficial de Galicia para que os interesados poidan formular as alegacións que consideren oportunas. O censo definitivo será aprobado por resolución da titular da Consellería de Pesca e publicado no boletín oficial da Comunidade Autónoma nun prazo máximo de tres meses, contados dende a finalización do prazo de presentación das solicitudes.

Non se poderán incorporar novas embarcacións mentres non se acorde a actualización do censo e de cara á actualización do mesmo teranse en conta como criterios básicos, ademais da pertenza a portos cercanos, a habitualidade e as capturas realizadas no ámbito da reserva polas embarcacións que xa estivesen incluídas.

Serán causas de exclusión do censo o incumprimento da normativa de uso e xestión da reserva e a negativa á realización do control das actividades polo Servizo de Gardacostas ou polo persoal de xestión, seguimento e control da Reserva Mariña de Lira.

Usos pesqueiros permitidos e mergullo de lecer

As embarcacións que estean incluídas no censo poderán desenvolver a pesca marítima profesional nas áreas non delimitadas como reservas integrais, coas artes e aparellos tradicionalmente empregados na zona: artes de anzol (cordel, palangrillo e palangre de fondo para congro), nasas (de polbo, nécora e camarón), artes de enmalle (trasmallos, miños, betas e xeito) e outras artes como a do gancho e espello para a captura da centola.

En canto á navegación e fondeadura, as embarcacións que realicen actividades de pesca na reserva mariña deberán comunicarlle ao persoal de xestión, seguimento e control a súa entrada na zona, identificándose convenientemente e notificando as capturas que leven a bordo nese momento. Do mesmo xeito, terán que notificar a súa saída e informar do número de artes que deixan caladas e as capturas realizadas na zona da reserva.

Segundo recolle a Orde publicada hoxe, na Reserva Mariña de Lira poderanse practicar actividades subacuáticas na modalidade de mergullo autónomo recreativo, aínda que suxeitándose a unha serie de condicionantes: levar a documentación que acredite o cumprimento dos requisitos para practicar o mergullo, solicitar a autorización de emprego de lanternas ou focos, perturbar o menos posible o estado do medio e preservar a integridade de individuos ou comunidades dependentes do medio mariño, respectar a práctica da pesca profesional, seguir as indicacións do persoal de seguimento e control en todo momento, así como empregar a bandeira A do código internacional de sinais.

Deste xeito, está prohibido realizar mergullo de lecer sen a preceptiva autorización cando o acceso estea limitado, practicar inmersións nocturnas, o emprego de torpedos ou outros medios de propulsión submariña, a tenza de calquera instrumento que poida empregarse para a pesca ou a extracción de especies e a recolección ou captura de organismos animais ou vexetais que estean vivos ou mortos. Así mesmo, non se poderá extraer ningún mineral ou resto arqueolóxico, alimentar aos animais durante as inmersións, perturbar ás comunidades de organismos mariños ou executar probas de mar ou prácticas de escolas de mergullo.

Seguimento científico e divulgación

Por outra parte, esta Orde recolle que a Consellería de Pesca e Asuntos Marítimos, a través da Dirección Xeral de Innovación e Desenvolvemento Pesqueiro, elaborará un proxecto de seguimento científico da reserva mariña para coñecer a súa evolución. O desenvolvemento deste programa de seguimento realizarase baixo a coordinación do Órgano de Xestión, Seguimento e Control da Reserva Mariña de Lira.

Así mesmo, o departamento de Innovación e Desenvolvemento Pesqueiro da Consellería será o encargado de elaborar anualmente un informe sobre a área protexida que será difundido ao sector, institucións e entidades interesadas para o seu coñecemento. Ademais, o devandito departamento, proposta do Órgano de Xestión, Seguimento e Control, realizará as actividades de formación, información e divulgación que se consideren necesarias e oportunas.

A primeira de Galicia

A Reserva Mariña de Interese Pesqueiro “Os Miñarzos” de Lira é a primeira destas características que se crea en Galicia. Coa súa creación búscase protexer e favorecer a rexeneración dos recursos pesqueiros, impulsar a pesca sostible e conservar a flora e a fauna do medio mariño e a súa diversidade. Así mesmo, preténdense divulgar os valores pesqueiros e ambientais da costa galega e o apoio a estudos científicos sobre as medidas de protección dos recursos e a xestión das pesquerías.

Ademais, coa posta en marcha deste espazo mariño protexido tentaranse acadar novas oportunidades socioeconómicas no eido do turismo e do lecer, que favorecerán a diversificación das actividades da comunidade pesqueira e a posta en valor dos profesionais do mar e da cultura mariñeira.

A Reserva Mariña de Lira, tal e como recolle o Decreto 87/2007, contempla a delimitación dunha área de interese pesqueiro e de dúas de reserva integral. Dentro da primeira están permitidas, entre outras actividades, a pesca marítima profesional con artes e aparellos empregados tradicionalmente na rexión, para o que será preciso estar inscrito nun censo de buques autorizados; a recollida de ourizo, navalla, poliquetos, anémonas e percebe conforme ao Plan de Explotación anual aprobado; o marisqueo a pé e a recollida de algas segundo recolla o citado Plan, así como a recolla de mostras de flora e fauna mariñas con finalidade científica.

Pola súa banda, nas zonas da reserva integral queda prohibida a práctica da pesca marítima, a extracción de fauna e flora e a realización de actividades subacuáticas, coa excepción das actividades destinadas á toma de mostras autorizadas con fins científicos ou de seguimento da Reserva.