viernes, 14 de agosto de 2026
A directora xeral de Promoción Industrial e da Sociedade da Información da Consellaría de Innovación e Industria, Helena Veiguela, avogou pola cooperación e o comercio mutuo entre Galiza e Portugal como oportunidade para ambos os dous países e como necesidade para o progreso definitivo da área territorial que compartimos. Helena Veiguela interveu no acto inaugural do IV Encontro Galiza-Portugal, que se desenvolve en Lisboa baixo a organización das cámaras de comercio de Vigo e da Coruña, no marco do Plan FOEXGA para o fomento das exportacións.
A directora xeral de Promoción Industrial apostou por conformar unha base mais ampla para que as empresas galegas e portuguesas teñan acceso aos produtos, recursos e servizos dos que non dispoñen no seu contorno máis inmediato, a través da proximidade xeográfica, persoal e cultural, co obxectivo de que a relación provedor-cliente se enriqueza para mutuo beneficio, mellorando a capacidade duns e doutros.
A historia económica de Galiza e Portugal, segundo expuxo Helena Veiguela, seguiu unha traxectoria similar, experimentando os dous países un forte proceso de integración que, para a directora xeral, está permitindo crear lazos cada vez máis estreitos e fortes. Tanto Galiza coma Portugal teñen un tecido empresarial caracterizado pola pequena empresa, o que, nun contexto de produción mundial estruturado a través de grandes multinacionais, eleva a necesidade de colaboración para acadar maiores niveis de competitividade.
A directora xeral de Promoción Industrial achegou ademais información sobre as relacións comerciais entre ambos os países. Así, dende 2005 as exportacións galegas a Portugal rexistraron un incremento acumulado do 56%, mentres que aínda foi superior o aumento das exportacións portuguesas a Galiza, cun aumento de case o 150%. Hoxe en día Portugal vende máis a Galiza, salientou Helena Veiguela, que a países como Italia, Estados Unidos ou Bélxica.
Máis de 250 empresas de Galiza, Portugal, Cabo Verde, Madeira e Azores participan neste IV Encontro Galiza-Portugal, no que están axendadas case 400 reunións de negocios. Unhas 40 empresas galegas e 90 portuguesas participan na rolda de negocios do Encontro, ás que a directora xeral agradeceu a súa asistencia. No acto inaugural tamén estiveron presentes o embaixador español en Lisboa e o embaixador de Cabo Verde.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
