viernes, 14 de agosto de 2026
Galicia está medrando a un ritmo aproximado do 4,2% e hai taxas de desemprego inferiores ao 6,7% segundo dixo o conselleiro de Presidencia, Administracións Públicas e Xustiza, José Luis Méndez Romeu. O conselleiro afirmou que isto é así debido á conxunción de varios factores: o investimento sen precedentes do Goberno de España en materia de infraestruturas, ao uso intelixente e rigoroso dos fondos estruturais europeos e debido a unha política autonómica que está priorizando o gasto produtivo, o gasto en I+D e o gasto en educación.
O conselleiro asegurou que os resultados están á vista tanto na área económica coma na área social e que a iso hai que engadir que Galicia é unha comunidade cunha cultura, cunha lingua, cunha historia e cunha riqueza monumental e paisaxística singulares. O conselleiro fixo hoxe estas declaracións na inauguración en Santiago do 5º Encontro Nacional de Mercados Municipais Minoristas: Servizo Público e estratexias empresariais.
Mercados Minoristas
Méndez Romeu manifestou que o comercio de proximidade é o modelo territorial baseado no establecemento dos usos do comercio, de produtos de primeira necesidade, en cuxo entorno se van ubicando outros servizos igualmente necesarios. Segundo o conselleiro, isto é o que fai posible a revitalización do tecido urbano, a aparición de servizos públicos e a mellora dos índices de seguridade, entre outras cousas.
Méndez Romeu afirmou que nos mercados tradicionais a relación está baseada no coñecemento do produto e non na marca branca, na relación persoal e non no autoservizo e na fidelización do trato permanente e non na campaña de promoción. Sobre iso pódese construír unha marca, unha diversificación de medios de pago e engadir outros servizos colaterais que poñan inda máis en valor ese equipamento.
Así, o conselleiro dixo que na nosa comunidade hai 100 mercados minoristas que axudan a construír outras tantas cidades. Neste sentido, o conselleiro explicou que na vella Europa as cidades nacían como agrupación de comerciantes e polas necesidades do pequeno comercio ou comercio de proximidade.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
