Notas de prensa

O 95% dos empresarios do téxtil recoñecen a innovación para sobrevivir

As empresas do téxtil son as que máis concienciadas están entre as de todos os sectores de actividade galegos de que a innovación é un factor de supervivencia. Segundo o conselleiro delegado da Tecnópole e director xeral de I+D, Salustiano Mato, a cantidade de empresarios galegos do téxtil que están seguros de que a súa vantaxe competitiva radica na I+D+i supón o 95% do total.

Mato fixo públicos estes datos, froito dun estudo realizado polo seu departamento, durante a súa intervención no ‘Encontro empresarial do sector téxtil 2007’, celebrado na Tecnópole -no concello ourensán de San Cibrao das Viñas-, no marco do programa de actividades da Rede de Transferencia de Tecnoloxía da Asociación de Parques Científicos e Tecnolóxicos Españois (APTE). � xornada asistiron máis de setenta investigadores, empresarios e xestores do sector téxtil de toda España, Portugal e Reino Unido para intercambiar experiencias, compartir proxectos e detectar posibles colaboracións.

O director xeral de I+D, que estivo acompañado polo delegado da Consellería de Innovación en Ourense, Xosé Antón Jardón, fixo fincapé en que o sector téxtil non só é estratéxico para o Goberno galego, senón que é un dos que máis garantías de éxito terá “se abraza a tecnoloxía e a investigación, o desenvolvemento e a innovación”. Neste sentido, lembrou que a Xunta está a elaborar un estudo para dinamizar a I+D+i no téxtil desde un punto de vista estratéxico e anunciou que se vai traballar específicamente en deseñar metodoloxías propias para o sector, respostando desta maneira ás demandas dos propios empresarios.

Fibras intelixentes

Os novos materiais que están a revolucionar o sector téxtil teñen a súa referencia nas fibras intelixentes e nas orgánicas, nas que a Asociación de Investigación da Industria Téxtil (AITEX) está a traballar de maneira pioneira en España. Tal e como explicou o coordinador dos grupos de investigación desta asociación, Vicente Cambra, o futuro está, por un lado, nas fibras intelixentes, coma as aramidas, de alta resistencia ao impacto e con aplicacións na automoción –para os monos dos pilotos e copilotos de carreiras-, e nas biofibras, das que un bo exemplo son as de quitina, elaboradas a partir dos caparazóns de cangrexos e langostas.

O paso seguinte, no que xa se está traballando, é a aplicación da nanotecnoloxía aos tecidos, que, segundo Cambra, os dotará dunha maior versatilidade, como ocorre cos que xa se están desenvolvendo para ter aillamento acústico ou servir como rexeneradores de tecido humano en doentes con queimaduras graves.

Casos de éxito

Aínda que en Galicia non son moitas as empresas que teñen unha estratexia sólida de innovación baseada en recursos propios, existen algúns exemplos que xa son verdadeiros casos de éxito. É o que ocorre coa Sociedad Téxtil Lonia (responsable da produción en España de Carolina Herrera e de Purificación García), onde se traballa coa máxima da “importancia de innovar para diferenciarse”, segundo expuxo durante a xornada Ramón Vila, responsable de I+D+i da empresa, que insistiu en que é cada vez máis importante que as empresas do téxtil conten con departamentos de I+D+i propios.

Pola súa banda, �ngel Diéguez, director xeral de Roberto Verino Difusión –centro de I+D da firma, con sé no Parque Tecnolóxico de Galicia-, explicou que as empresas do sector teñen que enfrontarse a un contexto marcado polo aumento da competencia, mercados máis dinámicos e globais e novas esixencias do consumidor. Segundo a súa visión, esto esixe unha estratexia de innovación flexible, integrada e veloz que combine o avance da tecnoloxía e a estratexia de negocio e que afecte a toda a cadea de valor, desde o deseño e a técnica á loxística, o márketing e a venda.

Ferramentas e solucións

No eido das ferramentas, están a implantarse novidades que suporán cambios mesmo nos sistemas actuais de identificación dos produtos. Joan Noms, representante do centro tecnolóxico CETEMMSA no encontro, explicou que están a desenvolver un sistema baseado na tecnoloxía de identificación por radiofrecuencia destinado a subistituir os actuais códigos de barras, coa vantaxe de permitir a identificación do produto a distancia. Estes sistemas xa están a ser implantados con éxito en empresas como Pronovias.

Polo que se refire ás Tecnoloxías da Información e das Comunicacións (TIC), Microsoft está a levar a cabo un plan para dinamizar o mercado, explorando as necesidades de solucións nas empresas galegas a nivel sectorial, como expuxo a directora de Solucións ERP de Microsoft Dynamics, Isabel V. García, que anunciou esforzos específicos no sector téxtil.

Como proposta local no eido das TIC, presentouse ‘Ilion’, unha ferramenta informática desenvolvida pola empresa galega Iterdata Networks –ubicada na Tecnópole- para a integración global de procesos no sector retail-moda.

Polo que se refire ao financiamento da innovación no sector téxtil, a xefa de �rea de Políticas Industriais do Ministeiro de Industria, Carolina Vilar, explicou que existen axudas a zonas afectadas por deslocalización do sector textil-confección no marco do Programa de Reindustrialización do Plan de Apoio ao Sector Téxtil e da Confección.

No eido da formación, a directora da Escola de Estudos Superiores de Deseño Téxtil e Moda de Galiza, Lola Dopico, explicou que o centro do que é responsable é a primeira experiencia de introdución do deseño de moda na Universidade galega e que xorde como resposta ás necesidades que se aprecian no sector, identificadas a partir do contacto directo coas empresas. Segundo sinalou, no centro fórmanse profesionais que saen sendo deseñadores, pero con coñecementos de loxística, mercados exteriores, xestión, etc. “que hoxe son imprescindibles para operar con éxito no sector”.

Para tratar de darlle un importante pulo á actividade innovadora das empresas de toda España constituiuse o ano pasado a Plataforma Tecnolóxica Téxtil Española, con base nas directrices da política de innovación da UE. Segundo expuxo no encontro celebrado na Tecnópole o director de desenvolvemento corporativo do centro tecnolóxico Leitat, Antoni Paz, esta plataforma “pretende acelerar cambios e orientacións cara a I+D+i no ámbito empresarial”.