domingo, 8 de noviembre de 2026
O vicepresidente da Xunta, Anxo Quintana, analizou con representantes da Confederación Empresarial de Ourense os proxectos de dinamización económica e empresarial que a Xunta de Galicia ten para a provincia.
Durante a visita institucional que esta mañá realizou á sede da CEO, acompañado polo presidente da entidade, Francisco Rodríguez, e polo seu vicepresidente, Juan José Molinos, Quintana referiuse expresamente ao proxecto do Val da Rabeda que a Xunta desenvolve ao abeiro do programa Galiza Suma impulsado polas consellerías de Innovación e Industria e de Vivenda e Solo. O proxecto do Val da Rabeda, que prevé actuacións nos concellos de Allariz, Paderne, Taboadela e San Cibrao das Viñas, supón a creación de 4 millóns de metros cadrados de solo industrial cun investimento de 400 millóns de euros. Esta importante iniciativa, contempla ademais a rehabilitación de patrimonio e a construción de 2.000 vivendas protexidas.
Parque Tecnolóxico
Así mesmo, neste encontro Quintana trasladoulles aos empresarios ourensáns que a Xunta de Galicia está a mobilizar entre 2007 e 2008 máis de 8 millóns de euros de investimento en proxectos tecnolóxicos ligados ao Parque Tecnolóxico de Ourense, uns investimentos que, segundo anunciou, suporán a creación de 300 novos postos de traballo.
Entre estes proxectos, os máis avanzados, que estarán operativos no primeiro trimestre de 2008, figuran a creación dunha planta de demostración de enerxías alternativas, a posta en marcha dunha plataforma de empresas de base tecnolóxica, proxectos ligados á innovación para construír aeroxeneradores máis eficientes e o da firma TSolar relativo á aplicación da I+D+i no ámbito da enerxía solar.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
