Notas de prensa

Supersandwich, gañador do concurso Nsaio no Camiño

Lugo acolleu a final do concurso musical organizado pola dirección xeral de Xuventude da Vicepresidencia, Nsaio no Camiño que encheu as instalacións do Palacio de Feiras e Exposicións con máis de 4.000 persoas. O conxunto orixinario de Boiro Supersandwich fíxose co premio final: unha carreira discográfica, que inclúe grabación e promoción dun disco, un premio valorado en 30.000 euros.

Supersandwich é unha formación composta por once músicos que tocan instrumentos coma o trombóns, trompetas ou saxos. O seu estilo baséase na mestizaxe de sons como a rumba, o ska e o rock sobre unha base de funky. O grupo ensaia durante as fins de semana no local de ensaio que a Dirección Xeral de Xuventude ten en Boiro, e durante semana acuden ao local de Santiago.

Na final de onte participaron seis grupos, que foron os gañadores dos concursos previos que se celebraron nas modalidades de rock, pop, mestizaxe, novas tendencias, folk e hip-hop e que son, por esta orde, Pito de Pikasso, Capitán Furilo, Supersandwich, Colectivo Oruga, Coanhadeira e Solemne. No escenario estiveron acompañados polo grupo Los Suaves.

Esta experiencia pioneira tivo unha boa acollida tanto por parte do público como polos artistas participantes que amosaron o seu entusiasmo por actuar canda importantes grupos consagrados. Así mesmo, o xurado, composto tanto por membros da administración pública como por profesionais da industria musical, coincidiron en salientar a calidade musical e creativa dos participantes. Por iso, dende a Dirección Xeral de Xuventude xa se anunciou a intención de editar un disco recopilatorio coas cancións dos 6 grupos finalistas. Ademais, xa se empeza a traballar na segunda edición de Nsaio no Camiño para o ano vindeiro.

Éxito de participación

O director xeral de Xuventude, Rubén Cela, destacou o gran éxito de participación de grupos nesta primeira edición do concurso Nsaio no Camiño, así como a elevada afluencia de público, que asistiu ás seis citas que tiveron lugar durante o mes de xullo en distintas vilas galegas, e que, contando o concerto final de onte en Lugo, ascenderon a preto de 15.000 persoas.

Cela enmarcou este concurso musical dentro dun dos grandes proxectos que está a por en marcha a dirección xeral de Xuventude, que á Rede Galega de Locais de Ensaio. Esta rede, que contará a finais do ano 2008 con 30 locais, pretende facilitarlle á mocidade as canles axeitadas para manifestar as súas inquedanzas artísticas. Outro obxectivo da Rede Galega de Locais de Ensaio é o de servir de plataforma para a difusión da produción artística da mocidade galega, contribuíndo, ademais, á posible profesionalización dalgúns dos mozos e mozas usuarios dos locais.

Fases previas

O certame, que pretende ser un referente musical a nivel estatal, desenvolveuse a través de seis concertos nos que participaron os quince concursantes finalistas. As actuacións tiveron lugar en varias vilas galegas polas que discorren os distintos Camiños de Santiago: Mondoñedo, Fisterra, Verín, O Grove e Melide. Ademais dos concursantes, estes concertos tiveron como protagonistas a varios grupos consagrados dentro do panorama musical español, como Def con Dos, Deluxe, Macaco, Telephunken ou Berrogüeto.

O concurso, organizado pola Dirección Xeral de Xuventude grazas á colaboración da Sociedade Anónima de Xestión do Plan Xacobeo, arrincou xa con grandes expectativas dado o elevado número de maquetas presentadas, arredor dun cento, e a participación de público non foi menos enchendo o aforo en cada un dos concertos realizados.