Notas de prensa

A Asociación de Actores protesta pola non retransmisión da gala dos Max

A retransmisión desta gala pola segunda cadea da TVE viña sendo un hábito consolidado desde que se instituiron os premios Max e abráianos que este ano, e en datas tan tardías, se tome esta arbitraria decisión. Intuímos a man do Goberno detrás desta negativa, empurrado pola Xunta de Galicia, quen no seu momento negou o patrocinio a esta gala e agora pretende restarlle relevancia mediática á súa celebración na cidade de Vigo.
Non comprendemos por que, despois dos meses convulsos que atravesamos por mor do afundimento do Prestige e da guerra do Iraq, TVE se empeña en botarlle máis leña ao lume da crispación social e, sobre todo, nun tempo electoral no que o que máis cómpre por parte dun ente público son xestos de normalidade e non de controversia.
Así pois esta nosa protesta vai máis alá do que nos afecta aos cómicos como gremio e quere ser unha voz que atinxe a toda a sociedade: unha voz contra a utilización sectaria dos medios públicos de comunicación por parte dos gobernos, unha voz a prol do exercicio efectivo da liberdade de expresión, un exercicio que Televisión Española, unha televisión de todos, ten obriga de garantir.