viernes, 10 de abril de 2026
O segundo partido das seleccións galegas de baloncesto disputarase en xuño. A directora xeral para o Deporte, Marta Souto, e o presidente da Federación Galega de Baloncesto, Francisco Martín Micó, presentaron esta segunda aposta logo de que o ano pasado Galiza se enfrontase a Xapón, en Lugo na modalidade masculina, e en Vigo na feminina. Esta vez, as e os baloncestistas galegos mediranse a Bielorrusia.
Para esta segunda cita, os escenarios escollidos foron Vilagarcía e Ourense. Martín Micó destacou que " o partido da nosa selección feminina será unha homenaxe a Vilagarcía pola súa tradición no baloncesto feminino, xa que a través do Extrugasa ten levado ao máis alto ao baloncesto feminino galego", e destacou que este ano o Extrugasa xoga os play-off e busca a clasificación para Europa. O partido entre a selección feminina galega e a bielorrusa xogarase o 18 de xuño, ás 21h no Pavillón Fonte Carmoa. As galegas estarán dirixidas por Miguel Méndez e máis pola adestradora do Arxil, Maite Méndez.
En canto ao combinado masculino, Ourense foi a cidade escollida. Alí, Galiza e Bielorrusia enfrontaranse ao día seguinte, 19 de xuño, ás 21h, no Pazo dos Deportes. Quino Salvo repetirá como seleccionador masculino, esta vez acompañado por Ana Álvarez.
Francisco Martín Micó agradeceu a confianza da Dirección Xeral para a colaboración na organización destes dous partidos, e asegurou que serán partidos "moi disputados, xa que Bielorrusia ten unha selección nova e moi competitiva, que agora mesmo aspira ao pre-europeo".
Apoio dos afeccionados
A directora xeral para o Deporte, Marta Souto, confiou en que os afeccionados galegos ao deporte e ao baloncesto "arroupen á nosa selección como o fixeron o ano pasado fronte a Xapón, porque lucir a camisola de Galiza é sermpre un motivo de ilusión".
Os prezos das localidades serán, para os dous encontros, de 3 euros, unha cantidade moi asequible para que os pavillóns volvan estar ateigados. Nas vindeiras datas cada partido será presentado en Vilagarcía e Ourense, onde se darán a coñecer as listas de seleccionados e seleccionadas.
O presidente da Xunta, Alfonso Rueda, anunciou hoxe a posta en marcha dun programa específico para reducir o abandono escolar centrado en varóns e na poboación inmigrante sen educación secundaria de segunda etapa, é dicir, que non contan con títulos superiores ao de ESO. O responsable do Executivo autonómico apuntou que a redución do abandono escolar é un 'importantísimo asunto de carácter estrutural no que a Xunta está embarcada hai tempo'. Aínda que indicou que 'imos polo bo camiño', lembrando que Galicia pechou 2025 cunha taxa do 10,4%, case tres puntos por debaixo da media estatal, sinalou que 'non podemos conformarnos nin moito menos'. Así, lembrou que a taxa de abandono educativo temperán é case o dobre nos homes (13,5%) ca nas mulleres (7,2%), polo que o Goberno galego está a intensificar as medidas especiais sobre eles.
O XIII Carballo Interplay desenvolverá do 16 ao 19 de abril un programa de 32 actividades arredor da creación dixital contemporánea, das series en pequeno formato, a cultura de internet e a reflexión sobre os novos modos de comunicar na rede. O certame reforza este ano a presenza do galego como lingua de creación, conversa e pensamento no ecosistema dixital, cunha programación específica arredor dos contidos no noso idioma nas RRSS, accións formativas para a mocidade, premios dirixidos a recoñecer o talento que crea na nosa lingua e novas oportunidades para a produción de proxectos.
