Notas de prensa

O Consello da Avogacía Galega respalda aos letrados da quenda de oficio de Pontevedra

O Consello da Avogacía Galega, máximo órgano de representación colexial da Avogacía de Galicia, amosa a súa preocupación polas actuacións que se están levando a cabo respecto á quenda de oficio na provincia de Pontevedra. Situación que comezou a raíz
de que a Administración reclamara ao Colexio as retribucións
cobradas (uns 270.000 euros) naqueles casos nos que se demostrou que o defendido non tiña dereito á xustiza gratuíta. Asemade, destaca que é unha situación puntual, que non se está producindo no resto de colexios de avogados de Galicia.

Os membros do Consello, estiman necesaria a modificación do Regulamento de Asistencia Xurídica gratuíta, de modo que sexa a Administración a responsable de establecer os mecanismos necesarios para acreditar a insuficiencia de recursos económicos dos beneficiarios da xustiza gratuíta, na orde penal.

Nesta liña, onte asentáronse unhas pautas de colaboración entre o
Conselleiro de Presidencia, Administracións Públicas e Xustiza, Xosé Luís Méndez Romeu, a Directora Xeral de Xustiza, Begoña Santos, e o Consello da Avogacía Galega para que o Regulamento sexa modificado antes do verán.

En palabras de Xosé Antonio López Graña, Presidente do Consello da Avogacía Galega, “espérase axilizar a tramitación dos
expedientes de modo que se podan evitar situacións como a ocorrida en Pontevedra.

Noutros colexios ocorre que as resolucións das Comisións Provinciais de Xustiza Gratuíta se retrasan de xeito que, con moita frecuencia, son posteriores ás resolucións de fondo dos asuntos. Razón pola cal, con frecuencia, os avogados que defenderan ditos asuntos, non cobran da Xunta porque a os seus clientes non se lles recoñeceu o dereito á xustiza gratuíta, e tampouco poden cobrar do cliente directamente”.

Comunicado oficial

O Consello da Avogacía Galega comunica as principais conclusións do pleno:

• Expresar a súa fonda preocupación pola tensión creada a propósito da comprobación, inda en curso e non rematada, do cómputo de honorarios reportados polos letrados no servizo da quenda de oficio do ICA de Pontevedra, con relación ao primeiro cuadrimestre de 2005.

• Transmitir o seu desexo de que as dificultades aparecidas sexan
prontamente superadas, e ofrecerse para calquera xestión mediadora que poida conducir a unha completa identificación entre as partes interlocutoras.

• Manifestar a súa confianza en que unha depuración exhaustiva dos antecedentes, nun espírito de negociación e mutua comprensión, reducirá considerablemente o alcance das diferencias inicialmente rexistradas.

• Afirmar que o servizo público da xustiza gratuíta ten de funcionar sempre coa perspectiva de que os avogados e os procuradores deben percibir, previas as comprobacións oportunas, as sumas que, en definitiva, lles correspondan polo traballo efectivamente realizado (incluso excepcionalmente por vía de indemnización, naqueles casos nos que fora denegado o beneficio e non fora factible percibir a retribución con cargo ao xusticiable).

• Sinalar que, sen prexuízo da colaboración esixible aos profesionais e aos seus Colexios, a carga de acreditar a insuficiencia de recursos económicos dos beneficiarios da xustiza gratuíta, na orde penal, grava fundamentalmente á Administración pública.

• Destacar a urxencia de modificar o vixente Regulamento de Asistencia Xurídica gratuíta, en diversos aspectos mellorables, medida que habería contribuír a minimizar disfuncións como aquelas ás que se refire a presente declaración.

• Confirmar aos Sres., D. Evaristo Nogueira Pol, D. Arturo González Estévez, Decanos dos ICAS de Santiago de Compostela e de Ourense, Vocais deste Consello, e D. Xosé Antonio Araújo Hernández, Secretario Técnico Letrado do ICA de Vigo, como integrantes da Comisión de Xustiza Gratuíta deste Consello, que, entre outras tarefas, fará o seguimento dunha futura revisión de Regulamento devandito.

Sobre o Consello da Avogacía Galega

O Consello da Avogacía Galega, creado en 1993, é o órgano superior da administración colexial da avogacía galega, aglutinando a todos os Colexios de Avogados de Galicia: A Coruña, Lugo, Ourense, Pontevedra, Santiago de Compostela, Vigo e Ferrol.

Así, ten por obxecto agrupar e coordinar aos distintos colexios
integrados, e asumir a súa representación en cuestións de interese común profesional, no ámbito autonómico. Para garantir dita representación, o Pleno do Consello de Avogacía está formado polos Decanos de cada un dos Colexios integrados, coas figuras de Presidente, Vicepresidente, Secretario e Vogáis.

Como máximo representante da profesión en Galicia, o Consello vela polo correcto exercicio da profesión, é o máximo interlocutor perante a administración e a sociedade. Así, entre outras funcións, se ocupa de:

• Coordinar a acción dos Colexios de Avogados de Galicia.

• Exercer con rigor o control deontolóxico dos seus membros

• Organizar o servicio de orientación xurídica e a quenda de oficio, para fornecer o acceso a xustizas ás persoas que carezan de medios económicos.

• Procurar a formación continuada dos profesionais mediante a
impartición de Cursos e Xornadas para mantelos ao día das novidades legais.