miércoles, 4 de noviembre de 2026
A Fundación Galicia Europa desenvolve en Santiago de Compostela unha sesión informativa sobre prácticas e saídas laborais na UE e en organizacións internacionais. O encontro, que se celebra na aula 25 da Facultade de Ciencias Económicas e Empresariais da USC, enmárcase dentro da campaña informativa posta en marcha pola Fundación Galicia Europa nas universidades galegas para orientar aos estudantes e mozos galegos das oportunidades formativas e laborais no ámbito comunitario e internacional.
Esta campaña foi iniciada a principios deste ano e nestes meses estivo presente no Campus de Santiago e no Campus da Coruña con cadansúa sesión informativa. Celébranse tamén encontros informativos nos campus de Pontevedra, Vigo e Ourense.
Ao tempo que se expón aos alumnos as distintas posibilidades, preséntase a Guía de Prácticas e Saídas Laborais na UE e en Organizacións Internacionais elaborada pola Fundación Galicia Europa. Este volume pretende presentar aos estudantes e mozos galegos de xeito esquemático pero exhaustivo as posibilidades de desenvolver unha carreira profesional nos eidos internacional e europeo. Ao tempo, especifícanse unha serie de institucións e entidades que ofertan estas saídas profesionais entre as cales figura a propia Fundación Galicia Europa.
O texto compila as distintas posibilidades e requisitos esixidos para realizar estudos en asuntos europeos, prácticas nas institucións comunitarias e empresas europeas e internacionais, así como os diversos programas relacionados co comercio exterior. No tocante ás organización internacionais, a guía conta con información sobre as estadías de prácticas das principais organizacións como Nacións Unidas, o Fondo Monetario Internacional, os programas de mozos expertos e os sistemas de acceso e oposición.
Esta guía estará dispoñible en galego e castelán na web da Fundación Galicia Europa http://www.fundaciongaliciaeuropa.eu
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
