Notas de prensa

O SLG considera inxustificada a dilación das negociacións sobre o prezo do leite entre as industrias e os sindicatos

Aínda que o Sindicato Labrego Galego considera positivo o feito de que, despois de tanto tempo, Política Agroalimentaria, industrias e sindicatos se sentasen a negociar, considera que esta dilación das negociacións é excesiva, pois a actual crise polos prezos do leite esixe que as negociacións se realicen o antes posible, pois delas depende a continuidade de moitas explotacións. O SLG, dende este punto de vista, agarda que, alomenos, tanto o conselleiro como as industrias manteñan o seu compromiso de realizar máis encontros para negociar a saída da crise do sector.
Por outra banda, en palabras da secretaria xeral do SLG, Lidia Senra, a actitude do conselleiro foi demasiado tibia, xa que pediu, textualmente, que os prezos queden onde están e, cando se poida, que suban. As industrias, lonxe de adoptar sequera un compromiso verbal, dixeron que xa contestarían.
Ademais, o SLG critica a actitude da patronal láctea galega, que se escuda en que non ten capacidade de decisión para cambiar os prezos, xa que este tipo de decisións son tomadas fóra de Galiza e do Estado Español por parte das directivas das multinacionais das que dependen. O SLG pensa que as decisións si que se poden tomar a nivel galego; é máis, ditas decisións poderían servir de pauta, xa que Galiza concentra ao 50% dos productores e productoras, e un 30% da producción do Estado Español.