lunes, 10 de agosto de 2026
A Consellería de Innovación e Industria está a promover un proxecto de turismo musical da discográfica Ouvirmos. Este proxecto aposta pola investigación e a recuperación do patrimonio musical para crear un novo modelo de turismo en Galiza. Dado o seu carácter innovador, a iniciativa acadou unha subvención de 48.000 euros do Programa de Ciencias Sociais da Dirección Xeral de I+D+i, contía que abrangue o 50% do seu custe total.
O proxecto consiste nun exhaustivo traballo de documentación en quince localidades galegas para establecer rutas turísticas de interese musical. Trátase de Pontevedra, Celanova, Mondoñedo, Betanzos, Tui, Santiago de Compostela, A Coruña, Ribadavia, Ferrol, Monforte de Lemos, Lugo, Vigo, Ourense e o conxunto formado por Muros e Noia. A investigación, que comezou no ano 2006, prolongarase durante catro anos.
O grupo de traballo está formado por historiadores da arte e da música e técnicos de patrimonio. Unha vez sistematizada toda a información recollida de cada localidade, este equipo localiza os puntos de interese e establece un percorrido de aproximadamente unha hora de duración en cada zona. Xosé Manuel Aldea, xerente e fundador de Ouvirmos, explica que as fontes de traballo para deseñar estes itinerarios son os axentes locais que puideron manter vivo o patrimonio durante décadas. Documentámonos a través de revistas, tanto xerais como locais, pero tamén nos cafés e nos liceos, ou a través de bandas, de agrupacións folclóricas ou mesmo das institucións eclesiásticas, explica Aldea.
O proxecto materialízase finalmente nun soporte físico, nunha serie de publicacións de Itinerarios Histórico-Musicais. Na actualidade xa está rematado o itinerario de Pontevedra, un libro no que se repasa a tradición musical, a historia dos edificios vinculados á música, os máximos expoñentes artísticos da cidade e unha ruta sinalizada. Ademais das fotografías que ilustran o contido, a publicación está acompañada dunha Guía de escoita, unha selección de seis pezas recollidas nun disco compacto.
NOVAS FÓRMULAS
Como referente para este proxecto de innovación, Ouvirmos toma a promoción turística da música que se fai en Francia, onde este tipo de turismo xa está moi desenvolvido. Adaptar este modelo a Galiza é, para esta editora, avanzar nunha tipoloxía turística particular, feita a medida e fuxindo da masificación e da sobreexplotación dos recursos. Os promotores desta iniciativa sinalan ademais que as rutas musicais que propoñen poden integrarse dentro doutras que teñen como finalidade coñecer a cultura e a sociedade galegas. Visitas específicas, guías turísticos formados na materia e eventos como concertos especializados destinados a grupos reducidos engadirían valor a estes itinerarios.
A realización deste proxecto é posible grazas ao Programa de Ciencias Sociais da Dirección Xeral de I+D+i, destinado á investigación, o desenvolvemento e a innovación no ámbito das ciencias sociais e culturais. Entre as súas áreas de prioridade está o patrimonio artístico e cultural, e máis concretamente a realización de proxectos como o de Ouvirmos de procura de novas fórmulas para rendibilizar de modo sustentable o patrimonio cultural galego.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
