miércoles, 17 de junio de 2026
A exposición sobre neurociencia O mundo na túa cabeza volve a abrir este luns as súas portas despois da boa acollida que tivo o ano pasado no seu percorrido por diferentes vilas galegas. Ribadavia (Ourense), O Grove (Pontevedra) e Sada (A Coruña) serán as primeiras das nove localidades que durante 2007 acollerán esta mostra e os cafés científicos que as acompañan. A iniciativa está promovida pola Consellería de Innovación e Industria e coordinada polo Museo de Historia Natural Luis Iglesias da USC.
A exposición presentouse con motivo da Semana da Ciencia 2006 e o seu éxito de público (visitárona máis de 8.600 persoas en novembro e decembro do ano pasado) fixo que a Consellaría decidise darlle continuidade este ano cun itinerario que comeza este luns, día 26, na localidade ourensá de Ribadavia.
Baixo o título global de O mundo na túa cabeza agrúpanse tres mostras relacionadas coa neurociencia, nas que o cerebro e o sistema nervioso son os protagonistas. Son ¿Estás seguro do que ves?, A máquina de crear realidades e ¿Que sabemos e como no lo contaron?. Para a súa elaboración, o Museo Luis Iglesias contou coa colaboración de expertos en neurociencia como Xurxo Mariño e Casto Rivadulla, membros do grupo de investigación Neurocom (Universidade da Coruña), e de Rafael Sixto, especialista en didáctica da ciencia.
Como novidade, as exposicións compleméntanse coa celebración de cafés científicos. Lonxe do tradicional formato de conferencia, estas reunións permiten a interacción de científicos e público no ambiente distendido dunha cafetería. Nos cafés participarán os profesores Casto Rivadulla, Xurxo Mariño e Javier Cudeiro, e os actores Vicente de Souza e César Goldi.
TRES MOSTRAS, TRES LOCALIDADES
A mostra ¿Estás seguro do que ves? está pensada como un percorrido polo cerebro: dende o ollo até a creación de imaxes na cortiza, con experiencias interactivas, ilusións ópticas, visión nocturna e animacións en 3D. O luns será inaugurada na antiga Igrexa da Magdalena de Ribadavia e o día 2 de marzo terá lugar, ás 20.00 horas, un café científico no Café Aljama cos profesores Casto Rivadulla e Xurxo Mariño, así como o actor Vicente de Souza.
¿Que sabemos e como no lo contaron? abrirá as súas portas na Casa da Cultura de Sada o próximo martes día 27. A exposición amosa o proceso da información dende os sentidos até o cerebro e está deseñada coma unha viaxe na que o punto de partida son as percepcións sensoriais humanas e o destino o procesamento da información no encéfalo. Amosa ademais unha perspectiva histórica da neurociencia e detalla técnicas utilizadas na investigación nesta materia ao longo da historia. Como complemento da mostra, o 16 de marzo celebrarase un café científico no café La Terraza, a cargo do profesor Javier Cudeiro e do actor Vicente de Souza.
Por último, A máquina de crear realidades está composta por unha sucesión de experiencias sobre a investigación e o funcionamento do cerebro humano. Permite observar neuronas no microscopio, percibir ultrasóns e probar a destreza de cada un fronte a un ordenador. Será a vila do Grove a que acolla esta exposición, que se presentará na Casa da Cultura o mércores 28 de febreiro. Neste caso, o café científico celebrarase na Cafetería Menta y Chocolate o día 9 de marzo, cos profesores Casto Rivadulla e Xurxo Mariño, xunto co actor César Goldi.
A mostra enmárcase dentro das actividades do Programa de Comunicación e Sensibilización Social do Plan Galego de I+D+i 2006-2010, IN.CI.TE. O seu obxectivo é facilitar un maior coñecemento da ciencia e a tecnoloxía na sociedade galega. Con iniciativas coma esta preténdese facer reflexionar aos cidadán sobre a evidencia de que vivimos rodeados de ciencia e da importancia que ten para acadar o progreso e o benestar. A finalidade última é difundir a investigación que se está a realizar en Galiza, abrir ao público os espazos reservados á ciencia, facer da ciencia e da tecnoloxía unha materia atractiva para o cidadán de a pé, incentivar a participación da xente nas cuestións científicas e espertar vocacións científicas entre os máis novos.
Fotografía correspondente á inauguración desta mostra en O Barco.
A intelixencia artificial (IA), a súa gobernanza e o impacto na organizacións públicas centraron o II Encontro de Equipos de Tecnoloxías da Información e Comunicacións (TIC) das comunidades autónomas, celebrado hoxe en Madrid, no marco do Foro de Dixitalización das Comunidades Autónomas.A Xunta de Galicia estivo representada polo director da Axencia para a Modernización Tecnolóxica de Galicia (Amtega), Damián Rey, ao que acompañaron os responsables da Xerencia e das áreas de Administración Dixital, Infraestruturas e Seguridade, Solucións Tecnolóxicas Sectoriais, Transformación Dixital da Facenda Pública e a Oficina de Apoio Estratéxico e Planificación.
Deseñado e posto en marcha pola Consellería de Medio Ambiente e Cambio Climático a través de MeteoGalicia un servizo meteorolóxico de referencia na Comunidade, o chamado Sistema de Propagación de Incendios de Galicia (Spigal) permitirá dotar o operativo de loita contra o lume da Xunta dunha ferramenta tecnolóxica propia con capacidade para adaptarse á realidade en vivo, comparar distintos escenarios de evolución dun mesmo incendio e avaliar as medidas e actuacións en materia de extinción. Spigal superou xa unha fase de probas a partir dos datos reais dos incendios do verán pasado e está listo para entrar en funcionamento.
