martes, 7 de abril de 2026
A Expolingua de Berlín 2006 pechou as súas portas cun balance de visitas superior ao de edicións anteriores. Durante as tres xornadas, preto de 20.000 persoas visitaron o recinto da feira coa intención de obter información da situación e das posibilidades de estudo das diferentes linguas representadas polas arredor de 150 entidades presentes na Expolingua.
O expositor destinado á promoción do galego, situado nun espazo compartido coas outras linguas cooficiais de España, ofreceulle ao público de diversas nacionalidades información sobre o idioma galego e o seu territorio. Estudantes de linguas foron os máis interesados nas posibilidades de achegarse á lingua galega en Alemaña a través dos lectorados existentes nas universidades de Berlín, Trier, e Heidelberg.
Máis dun cento de visitantes recibiron, ademais, leccións de galego ao longo das tres xornadas co profesor lector Antón Porto, nas que aprenderon algúns saúdos e frases básicas da nosa lingua.
Novos modos de promoción das linguas
A experimentación con novos modos de promoción das linguas do Estado foi unha das experiencias máis salientables da Expolingua de Berlín. Un espazo de deseño contemporáneo, o apoio dun actor de mimo para animar aos visitantes a interpretar as súas primeiras expresións nas diferentes linguas, a proxección de materiais audiovisuais presentando os distintos territorios de España con lingua propia, foron algunhas das novidades da edición deste ano.
A Secretaría Xeral de Política Lingüística, o Instituto Cervantes, o Goberno vasco, Turespaña e o Instituto Ramón Llull presentaron ademais unha iniciativa pioneira para a promoción das linguas galega, vasca, española e catalá na Expolingua, consistente en crear unha especie de pasaporte lingüístico, que cada visitante debía selar en cada expositor despois de pronunciar algunhas frases en cada unha das linguas. Ese pasaporte completado ofrece a posibilidade de participar no sorteo dun curso intensivo de aprendizaxe dun dos idiomas do Estado. No caso da lingua galega, resultou gañador un estudante peruano que reside na capital alemá, que terá a oportunidade de asistir a un curso de verán en Santiago.
Intercambio de materiais e experiencias
A parte dunha oportunidade de promoción da diversidade lingüística do mundo, a Expolingua constitúe un lugar de encontro das institucións nas que compartir experiencias de ensino e de planificación lingüística. Representantes da Secretaría Xeral de Política Lingüística estableceron nestas xornadas contacto con diferentes institucións coa intención de intercambiar materiais e experiencias para a promoción e aprendizaxe das linguas.
Na xornada do sabado, ademais, ofreceuse unha presentación na sala de conferencias da Expolingua sobre a lingua de Galicia, que contou cunha numerosa asistencia.
Nesta edición da Expolingua, España foi o país convidado de honor. Foron máis de 20 as institucións procedentes de España con presenza na feira, das preto de 150 que se instalaron durante estas tres xornadas. Entre elas, atópanse academias de idiomas, institucións culturais e centros de intercambio de linguas. O programa científico que acompañou á exposición ofreceulles aos visitantes, a través de numerosas ponencias e presentacións, a posibilidade de coñecer máis de preto as posibilidades de aprendizaxe das linguas do Estado.
O Carballo Interplay desenvolverá do 16 ao 19 de abril no Mercado de Carballo a súa 13ª edición cun programa de 32 actividades arredor da creación dixital contemporánea, das series en pequeno formato, a cultura de internet e a reflexión sobre os novos modos de comunicar na rede. O certame reforza especialmente este ano a presenza do galego como lingua de creación, conversa e pensamento no ecosistema dixital, cunha programación específica arredor dos contidos no noso idioma nas redes sociais, accións formativas para a mocidade, premios dirixidos a recoñecer o talento que crea na nosa lingua e novas oportunidades para a produción de proxectos audiovisuais nados no ámbito dixital.
A Cidade da Cultura celebrará o Día do Circo o vindeiro 19 de abril co espectáculo 'Sen patrón', da compañía galega Pistacatro, recoñecida co Premio Nacional 2025 desta disciplina artística. A proposta terá lugar no Xardín do Teatro, ás 17,00 horas, con entrada libre e de balde. Así, o Día do Circo convértese nun momento para celebrar tamén a chegada da primavera cunha proposta escénica aberta, festiva e accesible para todo tipo de públicos, que combina cabaré, números aéreos e malabares cunha dramaturxia que reivindica tanto técnicas circenses tradicionais como contemporáneas. Pistacatro é unha das compañías e produtoras de circo máis relevantes das artes vivas de Galicia, que traballa a prol da profesionalización do circo na Comunidade, impulsando as carreiras de artistas e traballadores do sector.
