Notas de prensa

Fernando Echávarri e Antón Paz recibiron o Premio Galicia Deporte 2005

Fernando Echávarri e Antón Paz recibiron o premio “Galicia Deporte 2005”, no transcurso da gala de entrega de premios aos mellores deportistas, adestradores, clubs e entidades do ano 2005.

Precisamente este premio foi unha das sorpresas da noite, xa que a parella de regatistas foi elixida entre todos os premiados das diferentes categorías, que tamén recibiron o recoñecemento polo seu traballo durante o ano 2005. Fernando agradeceu o premio destacando que “queremos dedicarllo a toda a xente que non está hoxe aquí, a todos os que traballan pola base, ás empresas que gastan moitos cartos en potenciar estas actividades”. Pola súa parte, Antón Paz, manifestou a súa ledicia polo galardón e confiou en que “sirva para que a vela se popularice un pouquiño máis e os nosos rapaces poidan practicar este deporte nas nosas rías”.

Ademais, tamén houbo unha distinción especial para dos ciclistas. Óscar Pereiro e Marcos Serrano recibiron unha mención polas súas vitorias de etapa no Tour de Francia, que foron as primeiras dun corredor galego nesta prestixiosa carreira. Ambos recoñeceron que a pesares do tempo transcurrido “non podemos esquecer un momento así xa que non é moi normal que dous amigos poidan gañar dúas etapas do Tour”.

No transcurso da gala a conselleira de Cultura e Deporte, Ánxela Bugallo, destacou que “queremos que estes premios sirvan para darvos as grazas pola vosa achega ao Deporte Galego e tamén porque vós sodes o mellor exemplo a seguir para os nosos cativos”.

Pola súa parte, o director xeral para o Deporte, Santiago Domínguez Olveira, destacou que “o deporte galego goza de boa saude e hoxe o volvemos demostrar ao repasar os éxitos colleitados no ano 2005: a saída da Volta ao Mundo a Vela dende Vigo, o debú da selección galega de fútbol, os éxitos dos nosos deportistas a nivel internacional, a Recopa Europea do Azkar, as vitorias de Pereiro e Serrano no Tour de Francia…. Pero o máis importante é que o 2005 foi o ano do futuro do noso deporte porque nel puxemos os alicerces para que Galiza avance neste eido”.

Ao evento, que tivo lugar no Centro Galego de Arte Contemporánea, asistiron os premiados, que agradeceron o recoñecemento do seu traballo, representantes das diferentes federacións deportivas galegas e deportistas galegos, que viviron con emoción a entrega dos premios, que foi dirixida polos xornalistas Yolanda Vázquez e Tomás Alonso.

Os premiados. En total foron 19 as modalidades premiadas, facendo un percorrido por diferentes deportes, dende os máis coñecidos ata outras modalidades con menos ademais do premio especial “Galicia Deporte 2005” que se elixirá entre todos os premiados nas diferentes modalidades e dúas mencións especiais. Estes dous últimos apartados deronse a coñecer no transcurso da gala, á que asistiron os premiados, ademais de representantes das federacións deportivas galegas e do Deporte Galego en xeral.