miércoles, 12 de agosto de 2026
O decano do Colexio Profesional de Xornalistas de Galicia (CPXG), Xosé Manuel Vega Gómez, e o presidente da Asociación de Escritores en Lingua Galega (AELG), Cesáreo Sánchez Iglesias, presentaron no Club Internacional de Prensa de Santiago un acordo de colaboración entre ambas entidades, cuxa
primeira concreción vai ser a convocatoria de un premio de xornalismo literario. Tanto Xosé Manuel Vega como Cesáreo Sánchez amosaron a súa satisfacción pola sinatura de este acordo, que segundo Sánchez "era unha vella ilusión" da AELG.
Despois de proceder á sinatura formal do texto do convenio, Xosé Manuel Vega sinalou que se trata de un acordo para a participación "en actividades de interese recíproco" do Colexio e a Asociación de Escritores, que se fundamenta na estreita relación entre xornalismo e literatura, profesións que en
ocasións, segundo Vega, "teñen límites difusos". Na súa intervención salientou tamén o dobre compromiso "cos problemas e co idioma do país" que comparten ambas institucións, e tamén ambas disciplinas.
A continuación tomou a palabra Cesáreo Sánchez, que se centrou na íntima relación entre xéneros, afirmando que "a escrita xornalística é tamén un xénero literario", e lembrando a múltiples figuras da lingua e da literatura galegas que unificaron ambas profesións, como Otero Pedraio, Seoane, Ferrín,
ou Fernán Vello. Incidiu tamén na importancia do traballo de escritores e xornalistas na "normalización social e cultural do país" non só coa escrita, senón tamén coas novas formas de comunicación.
O primeiro froito deste acordo, que vai incluír diferentes actividades, como cursos ou conferencias, será convocatoria conxunta de un premio que recoñeza o labor de escrita xornalística de un escritor e/ou xornalista. Cesáreo Sánchez
expresou a vontade da AELG de convocar un premio dedicado a este xénero, que se sume aos que a Asociación xa convoca de narrativa, poesía, crítica literaria, ensaio, traducción... Así, o galardón recén presentado coincidirá na entrega cos mencionados, que se fan públicos cada ano a principios do mes das Letras. O sistema de funcionamento do premio será o que ata agora empregan ambos colectivos: colexiados do CPXG e asociados da AELG proporán candidatos, que despois serán votados democraticamente entre os mesmos xornalistas e escritores.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
