miércoles, 12 de agosto de 2026
O Colexio Profesional de Xornalistas de Galicia (CPXG) e a Delegación en Galicia do Colexio Oficial de Enxeñeiros Navais e Oceánicos asinaron un convenio de colaboración aproveitando os aspectos de carácter social e público que comparten.
Este acordo materializouse na convocatoria do 'Premio ao mellor Artigo Xornalístico sobre o Sector Naval', publicado en prensa polos colexiados do CPXG ou polos do Colexio de Enxeñeiros Navais. Este galardón ten o obxectivo de recoñecer e difundir o traballo xornalístico que mellor analice o sector naval, e está dotado con 2.000 euros.
Poden presentarse á convocatoria todos aqueles artigos publicados na prensa galega entre 2005 e 2006. Deberase enviar unha copia ao enderezo de correo electrónico coingalicia@telefonica.net ou un CD á Delegación Territorial do COIN en Galicia (Avda. de Vigo, 135, Entr. 1º, 15403 - Ferrol). O prazo para presentar os traballos remata o martes 31 de outubro ás 14.00 horas.
O xurado, que estará composto por cinco profesionais de recoñecido prestixio elixidos por ambos colexios, escollerá a tres finalistas, e, entre eles, ao gañador. O fallo farase público o 30 de novembro, e a entrega do premio realizarase nun acto a celebrar en decembro de 2006 ou xaneiro de 2007.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
