domingo, 18 de mayo de 2025
O tradicional pregón marcará o inicio das festas do San Froilán 2006, uns festexos nos que participaron o ano pasado 400.000 persoas. Na edición deste ano, a gaiteira Susana Seivane moi vinculada á Lugo desde nena- será a responsable de ler o pregón desde o balcón da Casa Consistorial. O acto, que terá lugar este mércores ás 20:30 horas, rematará coa irrupción das míticas personaxes do San Froilán: Pelúdez e Familia, que ofrecerán o seu espectáculo con sorpresas na Praza Maior a partir das 20:45 horas.
Os actos oficiais, programados para este día de inauguración dos festexos, continúan ás 21:15 horas coa apertura da porta do Cárcere da Muralla, que correrá a cargo dun representante da Unión Xeral de Traballadores de Lugo.
A cantante Rosario abrirá o ambicioso programa de concertos gratuítos. Na Praza Nova de Ramón Ferreiro, estreando escenario, a artista presentará o seu oitavo disco Contigo me voy. A partir das 22:00 horas, o público gozará da arte da pequena dos Flores que achega un álbum cheo de inspiración e de forza, resultante da incursión en distintos estilos e do afondamento nas súas experiencias vitais que marcaron a súa traxectoria persoal. Ademais, contou para estas once cancións coa inestimable colaboración de músicos tan recoñecidos como Antonio Vega, Amparanoia, John Parsons ou Juan Maya entre outros.
A música protagonizará esta noite de estrea coa verbena que ofrecerá a orquestra Jerusalén na Praza Maior dende as 22:30 horas. Por outra banda, as rúas estarán animadas polas charangas Os Centellas e o Gran Polbo Xigante que percorrerán o centro histórico a partir das 00:00 horas. Á mesma hora, no patio do edificio administrativo do Concello, comezará o concerto dos grupos lucenses Holywater e Oceans Garden, que deleitarán ao público co seu repertorio.
Por outra banda, dentro do programa das actividades deportivas, ás 21:00 horas terá lugar o encontro correspondente á xornada da Liga Nacional de fútbol sala entre o Azkar Lugo e o Guadalajara no Pavillón Municipal. Os interesados en asistir poderán retirar invitacións na caseta de información do San Froilán, situada na praza Maior, ou nas instalacións das piscinas municipais das Pedreiras e de Frigsa.
O ciclo de concertos Orballo Cultural vén de presentar a súa edición 2025, que se celebrará entre os meses de maio a setembro. Este ciclo propón levar ata distintas localidades da xeografía galega, concretamente aos concellos de Estrada, Tomiño, O Porriño, Ribadavia, Muxía, Noia, Ferrol e Sanxenxo, a artistas da escena musical galega. Entre os nomes xa confirmados están Xabier Díaz & Adufeiras de Salitre, Su Garrido Pombo, Herdeiros da Crus ou The Limboos. O ciclo Orballo Cultural busca unir a variada oferta musical de Galicia co patrimonio cultural e natural de distintas localidades, de tal modo que se pon en valor a rica variedade de opcións turísticas da comunidade. Ademais, integra a gastronomía e a artesanía como valores engadidos, nunha proposta que quere apostar pola sostibilidade e a igualdade.
A exposición afonda na realidade das cantareiras dende o século XVIII ata os nosos días. Daquelas, as mulleres das aldeas tocaban por pura necesidade, xa que non había outra maneira de escoitar música ca creándoa. Frei Rosendo Salvado e Rosalía de Castro xa se interesaron no seu tempo polas cantigas populares galegas considerándoas 'pura poesía, sen artificio' a pesar de estar nunha lingua diferente da oficial e proviren de mulleres labregas, de clase baixa. Rosalía foi, de feito, quen máis se identificou con esa literatura, empatizando co sentimento do pobo e levándoo ás altas esferas da época. A mostra tamén recolle, a través de varios documentos, o interese de persoas estranxeiras como Dorothé Schubarth, Alan Lomax ou Gustav Henningsen pola nosa tradición.
