miércoles, 12 de agosto de 2026
O estadio Manuel Anxo Cortizo de Lalín acolle o sábado 7 de outubro ás 18.30 horas o primeiro partido internacional de carácter oficial que disputará unha Selección Galega, concretamente a de rugbi, que se enfrontará á selección de Bearn (Francia) na xornada de apertura do Campionato de Europa de Rexións.
Na presentación deste encontro, celebrada esta mañá no Auditorio Municipal de Lalín, estiveron presentes o alcalde de Lalín e presidente da Fundación Deporte en Lalín, Xosé Crespo Iglesias; o presidente da Federación Galega de Rugbi, Juan Manuel Espiña; e o presidente do Club Rugbi Lalín, Manuel González Aller.
Xosé Crespo aproveitou a súa intervención para agradecer a confianza depositada pola federación en Lalín para acoller este partido histórico e convidou a todos os lalinenses, dezanos e galegos a acudir o sábado para arroupar á Selección e suplir co calor da afección a superioridade deportiva que a priori ten o rival. Co ánimo de encher o Manuel Anxo Cortizo, a entrada para este partido será gratuita.
Pola súa parte, Juan Manuel Espiña augurou un gran espectáculo deportivo e destacou que grazas a encontros como este Galicia e Lalín están a soar internacionalmente pola súa afección ao rugbi, feito constatado tamén na recente elección da xogadora lalinense Rocío García Eiras como mellor pellier do Campionato do Mundo celebrado en Edmonton (Canadá).
Finalmente, o presidente do Club Rugbi Lalín lamentou a escasa repercusión que está a ter nos medios de comunicación públicos de carácter autonómico esta cita histórica para o rugbi galego e contrastou esta situación co respaldo institucional e mediático que tivo o debú da Selección Galega de Fútbol a pesares de non tratarse dun partido oficial.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
