Notas de prensa

13 centros galegos de formación profesional ocupacional logran os certificados de calidade Aenor

O conselleiro de Traballo, Ricardo Varela, entregou os Certificados de Calidade AENOR a trece centros galegos de Formación Profesional Ocupacional, unha distinción que ten por finalidade recoñecer a calidade da súa xestión. No acto, o responsable de Traballo estivo acompañado polo director xeral de Formación e Colocación, Pastor Fuenteseca e o delegado de AENOR en Galicia, Martín Pita.

Na súa intervención, o titular de Traballo manifestou que “a calidade na formación é o primeiro obxectivo da Consellería de Traballo na formación dos traballadores, e temos que facer un esforzo para que esa calidade dea resposta á demanda empresarial, de tal xeito que a nosa formación responda ás necesidades do mercado de traballo, xa que ao chegar á Consellería comprobamos que existía un exceso de oferta de formación en actividades non demandadas polo mercado e un déficit nas máis demandadas, que polo tanto había que cubrir con traballadores de fóra”.
Pola súa banda, o delegado de AENOR en Galicia, Martín Pita, salientou que “neste acto se homenaxea a trece centros que implantaron o sistema de xestión con máis éxito a nivel europeo e mundial dos últimos 20 anos, baseado na eficacia, na transparencia e na calidade como estratexia, o sistema UNE-EN-ISO 9001:2000”.
O responsable de Traballo asegurou que “dende a Consellería se puxeron en marcha numerosas accións co obxectivo de mellorar a todos os niveis a calidade dos centros que imparten cursos do Plan de Formación e Inserción Profesional (FIP). Un obxectivo que se pon de manifesto mediante a difusión e implantación dun modelo de xestión de calidade para centros de formación ocupacional, tanto nos propios como nos colaboradores, destinado a mellorar a súa xestión e baseado na norma UNE-EN-ISO 9001:2000”.

Nese senso, neste último ano e, co obxectivo de apoiar activamente este proceso de mellora continua na xestión dos centros, levouse a cabo a implantación deste sistema cos seguintes obxectivos: homoxeneizar da sistemática de funcionamento na rede de centros impartidores de formación profesional ocupacional, por medio da implantación do enfoque da xestión por procesos e sistemas de calidade, asegurar a calidade no funcionamento da rede de centros de Formación Profesional Ocupacional, identificar e satisfacer as necesidades dos beneficiarios de cursos de Formación Profesional Ocupacional, e por último afianzar unha dinámica de mellora continua dos servizos formativos promovidos pola Xunta de Galicia.

Varela apuntou que esta serie de actuacións enfocáronse en función do colectivo destinatario: centros colaboradores e propios. Así, nos centros colaboradores con máis de 2 cursos do Plan FIP cun histórico de participación no proxecto de máis de 2 anos realizouse unha diagnose da situación respecto as melloras de calidade propostas en períodos anteriores. O resultado desta diagnose recolleuse nun informe en base ao cal se seleccionaron oito centros nos que se realizou o desenvolvemento e o apoio á implantación do Sistema de Calidade segundo os requisitos da norma UNE-EN ISO 9001:2000.

Así, os centros colaboradores de Formación Ocupacional Continua que tras este proxecto obtiveron o certificado de calidade foron o Centro FPO Municipal de Carballo, o Centro FPO Municipal de Arteixo, o Centro FPO Municipal de Burela, o Centro FPO Municipal de Ponteareas, o Centro FPO Municipal de Oleiros, o Centro FPO Municipal de Cangas, o Centro FPO da Asoc. Prov. de Restauración de Santiago, o Centro FPO da Asoc. Empresarios de O Deza.

O segundo colectivo no que se enfocaron estas actuacións foron os Centros propios e Unidades de Acción Formativa dependentes da Consellería, onde se levaron a cabo as seguintes accións: se apoiou a implantación dun Sistema de Xestión de Calidade, en cinco dos seis centros dependentes da Consellería, implantouse unha ferramenta informática de apoio para a xestión do Sistema de Calidade, así como os procesos clave para a xestión da formación na totalidade dos seis centros e nas Unidades de Acción Formativa de Ames e Monforte. Posteriormente fíxose unha diagnose individualizada e procedeuse ao apoio á implantación do Sistema de Xestión de Calidade, trala cal cinco dos seis centros (Ferrol, Santiago de Compostela, Lugo, Viveiro, Santa María de Europa en Ourense e Coia en Vigo) acadaron a certificación da calidade do sistema.

Ricardo Varela felicitou ás entidades distinguidas cos certificados de calidade AENOR, e subliñou que a obtención destes certificados lles colocará no primeiro lugar á hora de optar á convocatoria das probas dos certificados de profesionalidade, na que Galicia será pioneira no Estado.

Así, o conselleiro manifestou o seu desexo de que nos vindeiros anos se incorporen a estes certificados de calidade outras entidades galegas “para contar cun operativo de formación á altura dos modelos máis avanzados de España e de Europa”.