miércoles, 12 de agosto de 2026
A secretaría xeral de Igualdade da Vicepresidencia vai poñer en marcha na cidade de Santiago, un centro de recuperación integral para as mulleres galegas que sufran violencia de xénero. O centro situarase nas instalacións que ocupa a casa de acollida, tal e como acordaron a secretaria xeral de Igualdade, Carme Adán e o alcalde de Santiago, Xosé Sánchez Bugallo, no encontro que mantiveron no concello. As actuais instalacións serían reformadas e adaptadas ao seu novo uso, en función das recomendacións técnicas dos expertos que van a comezar a estudar a viabilidade do proxecto.
Igualdade pretende que este centro preste un servizo integral moito máis completo que o que se ofrece, a día de hoxe, nas casas de acollida.Segundo a secretaria xeral de Igualdade, Carme Adán, este centro prestaría un servizo de atención psicolóxica e xurídica e social ás mulleres a e as súas usuarias poderán permanecer no centro sen límite de tempo, ata que se produza a súa recuperación e integración social completa na sociedade.
Este centro de recuperación integral atenderá a todas as mulleres galegas vítimas de violencia de xénero, que sexan derivadas dende as casas de acollida ou dende os servizos sociais dos concellos. Serán os profesionais os que valoren que mulleres precisan deste tratamento integral. A apertura deste centro servirá para iniciar a posta en marcha dun sistema de intervención homoxéneo e homologado.
A posta en marcha deste centro, prevista para principios do ano 2008, é unha das medidas incluídas no anteproxecto de lei para a prevención e tratamento da violencia de xénero que está a elaborar a secretaría xeral de Igualdade.
Tanto dende a secretaría xeral de Igualdade como dende o concello valoraron de xeito moi positivo o acordo acadado , xa que a creación deste centro é unha necesidade na atención ás mulleres maltratadas.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
