Notas de prensa

O secretario xeral da Consellería de Traballo fai entrega a Fadesa do Premio á Excelencia na Xestión da Prevención de Riscos Laborais

O secretario xeral da Consellería de Traballo, José Vázquez Portomeñe, entregou o Premio á Excelencia na Xestión da Prevención de Riscos Laborais, da Fundación do Centro de Iniciativas Profesionais (C.I.P.), á empresa inmobiliaria e de construción FADESA polos seus excelentes resultados en materia de prevención de riscos laborais no último ano. No acto, que tivo lugar na sede da Fundación CIP, tamén estivo presente a directora xeral de Relacións Laborais, Pilar Cancela, e a vicepresidenta de FADESA, Mª Felipa Jove Santos.

O secretario felicitou a FADESA polo recoñecemento que se lle concede con este galardón e manifestou que se trata “dun expoñente do bo facer na Prevención de Riscos Laborais, xa que no último ano impartiu máis de mil horas de formación e numerosas actuacións relacionadas coa seguridade, alcanzando unha utopía en construción: cero accidentes graves e cero accidentes mortais”.

O fallo deste premio decidiuse despois de que se reunira o Padroado da Fundación CIP con diferentes expertos nas áreas de Seguridade, Hixiene e Ergonomía, que examinaron as memorias preventivas de distintas empresas, chegando á conclusión de que Fadesa era a que reunía as mellores condicións para a obtención da segunda edición deste premio. Segundo recoñeceu Vázquez Portomeñe “este premio á Excelencia na Xestión de Prevención de Riscos Laborais é o recoñecemento ao esforzo das empresas galegas comprometidas coa seguridade dos seus traballadores, feito imprescindible para conseguir un emprego estable e de calidade, o cal representa o obxectivo prioritario da Consellería de Traballo”.

Este esforzo comprometido coa seguridade dos traballadores, é especialmente significativo na actividade que desenvolve a empresa distinguida nesta II edición do premio, a construción, xa que se trata, tal e como apuntou Vázquez Portomeñe, do sector que presenta un maior índice de sinistralidade laboral, pois “representa o 12,6% da poboación afiliada e acumula o 26,3% dos accidentes con baixa laboral”.
O secretario destacou que aínda que no último ano tense reducido a repercusión dos accidentes graves e mortais neste sector, xa que en xullo de 2005 estes sinistros representaban o 35,8% do total de accidentes, e en agosto deste ano esa porcentaxe descendeu ata o 25,7%, se trata dunha cifra que “aínda non é suficiente polo que temos que seguir afondando e implementando as medidas necesarias para a súa erradicación”, sinalou o secretario xeral. Outro dato a ter en conta nesta redución da sinistralidade é o aumento da contratación indefinida, que se rexistrou neste sector, xa que en relación co ano pasado incrementouse nun 44%, o que o converte no sector económico cun maior ascenso deste tipo de contratos.

Vázquez Portomeñe fixo un repaso das medidas postas en marcha pola Consellería que dirixe Ricardo Varela no eido da seguridade e saúde no traballo. Entre elas, destacou o impulso, por parte do Goberno, do proceso de Diálogo Social, onde se estableceu como un dos principais obxectivos a concertación dun Gran Acordo para o Emprego en Galicia e outro Gran acordo para loitar contra a Sinistralidade, “este último xa deu os seus froitos en boa medida, xa que se ten pactado a Lei pola que se crea un novo Instituto de Saúde Laboral e se ten acordado o Plan Estratéxico de Loita Contra a Sinistralidade Laboral”, declarou Vázquez Portomeñe.

Mentres se acadaban estes acordos na Mesa de Diálogo Social, a Consellería de Traballo adoptou diferentes medidas directas para loitar contra a sinistralidade, pois, tal e como manifestou o secretario xeral, no marco do I Plan Integral de Emprego de Galicia “están a saír á rúa 125 técnicos de prevención no sector da construción e noutros sectores con maiores índices de incidencia da sinistralidade, para que realicen a súa actividade, (avaliación de risco e comprobación do plan de prevención, equipos e medios de protección utilizados, etc.) visitando diferentes empresas e centros de traballo e propoñendo ás modificación oportunas”.

O secretario recordou ademais que o pasado 15 de maio asinouse un Protocolo de Coordinación entre a Consellería e o Fiscal Xefe do Tribunal Superior de Xustiza de Galicia para a “investigación eficaz e rápida dos delitos contra a vida, a saúde e a integridade física dos traballadores así como para a execución efectiva das sentenzas condenatorias; realizáronse campañas intensivas específicas para evitar o risco de caídas de altura, nos meses de xullo e agosto; en breve porase en marcha o Plan Agro así como a publicación do Decreto de Habilitación dos Técnicos de Prevencións de Risco Laborais que permitirá, coordinadamente coa Inspección de Traballo, ampliar os recursos destinados á vixilancia e control do cumprimento da normativa de Prevención de Riscos”.

Actualmente, está en marcha o Plan Vixía, unha actividade formativa de prevención adicada ao sector pesqueiro, así como a campaña de sensibilización Moitollo, dirixida especificamente aos máis cativos, co fin de inculcar a cultura preventiva dende a propia escola.