miércoles, 12 de agosto de 2026
O Vicepresidente da Xunta, Anxo Quintana, anunciou en Moaña, nun encontro con familiares de enfermos de alzhéimer, que a Vicepresidencia investirá 9 millóns de euros ata 2008 na creación dunha rede de 11 Centros para enfermos de alzheimer. A rede suporá a creación e posta en marcha dun destes centros en cada unha das sete grandes cidades galegas, aos que se sumarán os de Moaña, Ribeira, O Porriño e Monforte.
O vicepresidente explicou que o progresivo aumento dos maiores de 65 anos en relación ao conxunto da poboación galega, e a necesidade de dar apoio institucional aos coidadores informais levou á Vicepresidencia a promover esta Rede de Centros para enfermos de Alzheimer e outras demencias. Segundo dixo Quintana, a maioría destes centros que formarán a rede xa se atopan en obras ou en proceso de acreditación.
Segundo explicou o vicepresidente, estes centros garantirán unha atención diúrna ás persoas con estas enfermidades, e permitirán coidados específicos segundo a fase da enfermidade en que se atope cada usuario. As súas actividades abarcarán dende a estimulación preventiva para retrasar a situación de dependencia que produce o alzhéimer, ata o desenvolvemento de actividades terapéuticas e o coidado durante toda a xornada no centro ou no propio fogar, nos casos máis avanzados.
Quintana anunciou ademais que esta rede se verá complementada cun servizo de transporte adaptado, que facilitará o traslado dos maiores que o precisen e superar deste xeito as dificultades derivadas da dispersión poboacional en Galiza.
O vicepresidente aproveitou a celebración hoxe do Día Mundial do Alzhéimer para deixar claro o noso grao de compromiso cos afectados por estas enfermidades. Un apoio que segundo dixo Quintana a Vicepresidencia leva a cabo coordinada coas familias e coas asociacións galegas que traballan neste eido. Así, lembrou que na implantación da Rede de Centros a Vicepresidencia conta coa colaboración da Federación de Asociacións de Familiares de Enfermos de Alzhéimer (FAGAL).
Encontro con familiares
Quintana celebrou o Día Mundial do Alzhéimer en Moaña, onde compartiu un encontro con familiares de enfermos con esta doenza da zona. Na Casa da Xuventude de Moaña, o vicepresidente lembrou que o alzhéimer é a primeira causa de demencia nos países desenvolvidos. En Galiza, segundo os datos facilitados por Quintana, unhas 50.000 persoas están diagnosticadas con este padecemento e outras demencias. Ademais o vicepresidente lembrou os efectos que o alzhéimer produce nas persoas, e fixo especial fincapé nas repercusións das familias coidadoras destes enfermos, especialmente nas mulleres e fillas dos afectados que son as que asumen maioritariamente este papel renunciando ao seu traballo, ao seu tempo de lecer e mesmo á súa propia saúde, lembrou Quintana.
Nesta labor o vicepresidente destacou ademais o importante papel que xogan as asociacións, punto de encontro das familias afectadas para compartir experiencias, información e procurarse apoio mutuo, dixo Quintana.
O vicepresidente aproveitou este encontro para reiterar ademais o noso firme propósito de mellorar a calidade de vida dos nosos maiores, proporcionándolles os coidados que precisan, promovendo a súa autonomía persoal e na medida do posible a permanencia no seu entorno, ademais de posibilitar actuacións que apoien e reforcen os coidados das familias como mellor xeito de garantir o benestar de todos os galegos e as galegas.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
