miércoles, 12 de agosto de 2026
O Consorcio Audiovisual de Galicia levará a cabo unha apretada axenda de traballo nos primeiros días do Festival de Cine de San Sebastián, o máis importante de tódolos que se celebran en España, dentro do seu plan de presenza do audiovisual galego nos acontecementos máis importantes do sector.
Estas accións comezan o venres 22 de setembro, data na que terá lugar a reunión que decidirá as películas subvencionadas polo programa Raíces na edición deste ano. Neste encontro, Fernando Salgado, secretario xeral de Comunicación e presidente do Consorcio Audiovisual de Galicia, estará acompañado por Nacho Varela, director-xerente do Consorcio. Á mesma tamén acudirán o presidente do Instituto de Cine Arxentino, Jorge Álvarez, o director do Instituto de Cine Catalán, Xavier Marcé, así como os representantes da Consejería de Cultura de Andalucía, comunidade que se incorpora este ano ao Fondo Raíces de Coprodución.
Rematada a xuntanza, farase público a decisión ante a prensa e os produtores dos territorios implicados, nun acto que se desenvolverá no Hotel María Cristina, onde tamén se darán a coñecer as novas accións do Fondo Raíces para o vindeiro ano, entre elas a promoción das producións subvencionadas no 2005, xa todas practicamente rematadas.
Reportaxes sobre o audiovisual galego
Coincidindo co festival, dúas das publicacións máis prestixiosas do mundo do cine, Variety e Screen International, incorporan senllas reportaxes sobre o audiovisual galego nas súas páxinas. Estas revistas, con edición única en inglés e distribuídas en todo o mundo, son unha referencia obrigada para todos aqueles relacionados co mundo do cine. A experiencia anterior demostra o interese que esperta Galicia internacionalmente e os múltiples achegamentos que esta iniciativa está a producir.
Por outra banda, nesta edición do festival e por primeira vez, estará presente unha delegación de institucións e produtores brasileiros no marco do denominado Sales Office, o espazo de mercado e encontro profesional do festival. Este colectivo manifestou xa o seu especial interese en coñecer máis de preto a realidade de Galicia, motivo polo cal terá lugar unha reunión do director do Consorcio co presidente do Cinema do Brasil, André Sturm, así como cos produtores brasileiros e galegos presentes o luns 25 en San Sebastián, coa intención de achegar posturas de cara a posibles coproducións.
A axenda complétase coa reunión anual da Spain Film Commission, e encontros con diferentes axentes e profesionais do sector audiovisual do Estado e internacionais.
Dentro da presenza galega na 54 Edición Donostia-San Sebastián Festival Internacional de Cine, salienta a participación de Luis Tosar, protagonista da película Las vidas de Celia, que compite en sección oficial, e a película Un franco catorce pesetas no ciclo Emigración, coproducida pola empresa galega Adivina Producciones, e que foi unha das cintas que contou cunha das maiores recadacións do ano, preto do 1.500.000 .
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
