miércoles, 12 de agosto de 2026
O 23 de setembro dá comezo o programa Coñece Brión, unha iniciativa do Departamento de Cultura e Deportes do Concello de Brión. Mediante esta iniciativa veciños e foráneos poderán achegarse máis de preto ao municipio para entender e apreciar o seu patrimonio histórico e natural.
A primeira proposta do programa será unha rota de sendeirismo circular que parte e remata na aldea de Forxán. Esta rota é unha das máis fermosas do municipio e denomínase Rota dos Cruceiros. A dificultade da camiñada é media-baixa. O prazo de inscrición para participar será ata o día 22 na Casa da Cultura. O Concello porá á disposición dos participantes un servizo gratuíto de transporte.
Os encantos da rota
O sendeirismo é xa unha actividade tradicional en Brión. Na imaxe que se vos presenta podedes ver tres sendeiristas recorrendo precisamente no pasado ano a Rota dos Cruceiros. Para os interesados diremos que este traxecto comeza no cruceiro da aldea de Forxán e rodea esta poboación pasando por un castro sen escavar desde o que se pode ver unha fermosa vista do río Tambre.
Diríxese logo ao río Traba, discorrendo pola súa beira entre a Ponte dos Carros e a Ponte da Igrexa. Neste tramo atópanse varios muíños de interese. Ao chegar á Ponte da Igrexa, cóllese á dereita dirección Pousada, onde se poden ver tres cruceiros de distinto tipo, destacando o chamado da Goriña, cruceiro de capela do ano 1673, o máis antigo do concello.Atravesando a aldea de Pousa, regrésase finalmente á beira do río Traba ata a igrexa de Santa María de Viceso e de aí ata o punto de partida.
Cabe destacar que hai tramos desta rota que coinciden co Camiño Francés, como se pode ver nas sinalizacións das zonas de Pousada e a igrexa de Viceso, especialmente.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
