miércoles, 12 de agosto de 2026
O presidente do Cluster de Biotecnoloxía de Galicia, Javier Fábregas, asegura que a nova entidade contribuirá "á mellora da investigación, do financiamento e do sistema produtivo" das empresas galegas do sector, o que se traducirá nunha maior facturación para elas. Fábregas, catedrático da Universidade de Santiago de Compostela, fixo estas declaracións no Parque Tecnolóxico de Galicia, na localidade ourensá de San Cibrao das Viñas, onde se celebrou a primeira asemblea do Cluster.
Segundo o máximo responsable desta alianza estratéxica, os obxectivos do Cluster son "posicionar a Galicia como rexión relevante en Europa" grazas a unha tecnoloxía de vangarda como é esta, unha ciencia multidisciplinar na que toman parte todas as disciplinas que teñen que ver coa vida.
No Parque Tecnolóxico de Galicia déronse cita representantes das 31 empresas que integran o Cluster desde a súa constitución no mes de agosto, aínda que xa hai solicitudes doutras 24 que se queren sumar a esta iniciativa. Segundo a caracterización dos membros da entidade que fixo Fábregas ante os medios de comunicación congregados en San Cibrao das Viñas "a actividade da maior parte delas está relacionada coa alimentación, pero tamén coa medicina, a agricultura, a acuicultura, a enxeñería ou a química".
O presidente do Cluster explicou que un dos seus primeiros cometidos foi a creación da Plataforma Galega de Biotecnoloxía, na que participan 54 grupos de investigación de Galicia. O seu obxectivo principal é optimizar o o contacto e o traballo conxunto entre os organismos públicos de investigación (universidade e centros tecnolóxicos de investigación) e as empresas de biotecnoloxía.
Os membros do Cluster avanzan na proposta que farán conxuntamente ó Centro de Desenvolvemento Tecnolóxico Industrial (CDTI) do Ministerio de Industria e ó Programa Marco de I+D da Unión Europea para o deseño de alimentos funcionais. Segundo explicou Fábregas, trátase de alimentos comúns dos que se consegue unha funcionalidade especial engadíndolles un principio activo. Como exemplo, falou de "peixe rebozado que baixe o colesterol ou a tensión arterial". O mercado dos alimentos funcionais está medrando un 14 por cento nestes momentos a nivel mundial, polo que o obxectivo do Cluster é que as empresas galegas se poidan posicionar estratéxicamente nel en lugar de quedar atrás.
Tal e como se puxo de manifesto durante a celebración da primeira asemblea do Cluster de Biotecnoloxía, a participación nel permitiralles ós seus membros dispor da oportunidade de realizar I+D+i punteira, concretamente e segundo Fábregas, "contar cos mellores investigadores europeos ó servizo das empresas galegas".
Ademais, o Cluster xestionará axudas autonómicas, estatais e europeas para financiar a investigación que se leve a cabo nas empresas que o integran, unha vantaxe importante dado que se trata dun sector moi dependente da innovación, polo que a captación de capital público para investigar faise vital. Fábregas advertiu de que "haberá comunidades autónomas que perdan estes fondos por falta de xestores, executores e iniciativas".
Obxectivos
O novo Cluster foi constituido para potenciar o desenvolvemento en Galicia dunha das disciplinas máis punteiras a nivel internacional, a das tecnoloxías que teñen que ver directamente coas ciencias da vida. Neste sentido, e co fin de optimizar o seu rendemento productivo, proxéctase traballar para xenerar biotecnoloxías específicas versátiles, susceptibles de maior rentabilización nas áreas de alimentación, acuicultura, bioinformática, biomedicina, química, medio ambiente, gandeiría e agricultura. Este coñecemento aplicarase, entre outros, a sistemas de diagnóstico, alimentos funcionais, envases intelixentes, incremento de productividade en prantas e animais, protectores de alimentos, principios activos e saborizantes naturais.
Ademais, figuran entre os seus obxectivos fundacionais avaliar as necesidades biotecnolóxicas para Galicia e realizar unha base de datos de coñecemento biotecnolóxico con noticias, formación, oportunidades de negocio, axudas, boletíns e estratexias de interese.
Por outra parte, xa se está a traballar en promover proxectos de investigación e desenvolvemento tecnolóxico para o desenvolvemento de novos produtos e de procesos máis eficientes, así como de especies novas ou optimizadas, microorganismos, prantas e animais para mellorar o seu crecemento ou a producción específica para utilización directa ou dos seus produtos activos. Relacionado con este obxectivo atópase o de fomentar propostas por parte das empresas que o integran para acadar financiación por parte da Xunta, do Goberno central e da Unión Europea con destino a iniciativas innovadoras.
Outro dos proxectos nos que colaborarán os membros do Cluster será na promoción do Congreso Europeo de Negocios Biotecnolóxicos. Paralelamente, emprenderanse actividades de formación de capital humano en xestión empresarial, técnicas biotecnolóxicas, creatividade e innovación biotecnolóxica, organización da I+D+i das empresas e da súaa relación cos centros públicos de investigación, accións concertadas, formación de consorcios, e organización, xestión e seguimento da I+D+i.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
