miércoles, 12 de agosto de 2026
O Centro Dramático Galego (CDG) inaugura en novembro o seu Centro de Creación Dramática Contemporánea coa posta en marcha do curso de escrita teatral Pistas para unha dramaturxia da actualidade baixo a dirección e coordinación do autor, actor, narrador e director escénico Cándido Pazó (Vigo, 1960), quen durante a temporada 2006-2007 será, ademais, o dramaturgo residente do CDG.
O curso estrutúrase en tres obradoiros de 15 horas de duración cada un, a través dos que se identificarán e estudarán os múltiples temas que poden definir a actualidade, rastrexando e experimentando os distintos enfoques, estratexias e camiños dramatúrxicos para abordalos. Ademais de Pazó, o dramaturgo valenciano Pazo Zarzoso e o portugués Abel Neves serán os profesores deste encontro, dirixido a todas aquelas persoas con interese na escrita teatral, preferiblemente con experiencia ou con formación probada en artes escénicas.
PRAZAS LIMITADAS
Os interesados en participar neste curso, para o que se establece un límite máximo de 12 prazas, poderán inscribirse dende hoxe e até o vindeiro 23 de outubro nas oficinas do Centro Dramático Galego (Rúa Nova, 34. Santiago), en horario de 9.00 a 14.30 horas. O prezo da matrícula é de 240 , cun desconto do 50 por cento para profesionais da escena, desempregados e estudantes.
Baixo o título O tema. Sobre que queremos escribir?, o primeiro dos seminarios que será impartido polo propio Pazó do 13 ao 17 de novembro centrarase en aspectos relacionados coa escolla dos temas e motivos de teatralización, dirección de conflitos e valoración dos potenciais puntos de partida.
Pola súa banda, Paco Zarzoso (Puerto de Sagunto, 1966), que vén de estrear Arbusht no Teatre Lliure de Barcelona dentro do Festival Grec 2006, traballará cos alumnos os elementos estruturais da obra no segundo dos seminarios, A estrutura dunha peza, que terá lugar en xaneiro de 2007. O último dos talleres, Diálogos. O acabado da peza, desenvolverase do 5 ao 9 de marzo a cargo do dramaturgo, poeta e novelista Abel Neves (Montalegre, 1956), quen porá énfase na estilística, na construción de personaxes, nos diálogos e nas resolucións finais. Os tres obradoiros celebraranse en horario de tarde, entre as 17.00 e as 20.00 horas.
Durante a súa estadía no Centro de Creación Dramática Contemporánea, os participantes escribirán un texto breve que, arrincando no primeiro dos seminarios, tomará forma no segundo e quedará practicamente rematado no terceiro. Para este fin, o dramaturgo residente establecerá un período de seguimento presencial e a distancia dos traballos dos alumnos posterior á celebración de cada un dos talleres. Ao remate do curso, o CDG organizará unhas lecturas dramatizas cunha selección dos textos xurdidos desta experiencia.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
