viernes, 14 de agosto de 2026
A secretaria xeral de Política Lingüística, Marisol López, asistiu á inauguración dun monumento para homenaxear a Castelao en Intxaurrondo, San Sebastián. A Casa de Galicia en Guipúscoa, que cumpre 75 anos de existencia, é a promotora deste proxecto, que se materializou hoxe coa asistencia das principais autoridades vascas, encabezadas polo lehendakari, Juan José Ibarretxe. Tamén asistiron o alcalde de San Sebastián, Odón Elorza, o presidente da Casa de Galicia en Guipúscoa, Xosé Ramón Varela, e Carlos Sixirei, en representación da Secretaría Xeral de Emigración, ademais de numeroso público.
Durante o acto descubriuse o monumento, o perfil do mapa de Galicia realizado en pedra e no que se practicou o baleiro que representa á autocaricatura de Castelao. A peza, realizada en granito, ten unha altura de 2,20 metros por 2 metros de ancho, e foi realizada por Xosé Antonio Vilaboa. A suscrición popular financiou o proxecto. Está situada no Parque de Castelao, no barrio de Intxaurrondo Sur de San Sebastián.
No acto de inauguración, a secretaria xeral de Política Lingüística referiuse ás estreitas relacións que mantivo Castelao con persoeiros distinguidos do País Vasco no exilio, onde galegos e vascos desenvolvían un activo labor divulgador da súa cultura e do seu pensamento para manter viva e puxante a lingua e a cultura dun pobo que na súa propia terra se vía forzado á marxinación.
Aquí, en Euskadi, está tamén parte da Galicia que en tantos lugares do mundo axudou a construír o país, indicou Marisol López, que valorou a defensa da nosa identidade e das nosas palabras realizada polos galegos da emigración. Esa é a continuidade que podemos darlle á obra e á entrega de persoas que dende a emigración construíron antano a nosa cultura, dende o coñecemento e o respecto dos pobos que os acolleron, concluíu.
Pola súa banda, o lehendakari vasco, Juan José Ibarretxe, aludiu á figura de Castelao como un exemplo de loita polos valores dun pobo, que empeñou a súa vida en insuflarlles aos galegos a aspiración por seren eles mesmos. Referiuse á Alba de Gloria do político rianxeiro para engadir que as súas bases ideolóxicas seguen vixentes hoxendía e cualificou a celebración de hoxe coma unha homenaxe do pobo vasco ao pobo galego.
Ademais do descubrimento da escultura, durante o acto celebrouse un aurresku de honor e fíxoselle unha ofrenda floral ao político e escritor rianxeiro.
O Proxecto Xenoma Galicia, que procura detectar variantes de risco para enfermidades hereditarias graves como o cancro de mama e ovario, a síndrome de Lynch ou a hipercolesterolemia familiar, xa permitiu detectar 42 persoas positivas entre as 2.504 mostras que se levan analizado. Este programa pioneiro de cribado xenético acada 2.504 mostras analizadas ata o de agora dos 4.261 participantes reclutados ata o momento, rexistrando unha taxa de positividade do 1,7 %. En decembro do ano 2024, botaba a andar o programa coa posta en marcha de dúas probas piloto, consistentes na recollida de mostras de sangue e de saliva.
O Festaclown volve a converter Vilagarcía de Arousa nun dos puntos de referencia do circo e das artes de rúa en Galicia, entre o 17 ao 22 de agosto, cunha programación que nesta edición reforza especialmente a súa dimensión internacional e o seu compromiso coa inclusión. Compañías e artistas procedentes de Colombia, Arxentina e Australia compartirán cartel con destacadas formacións galegas e do resto do Estado nun programa para todos os públicos que se desenvolverá fundamentalmente ao aire libre en rúas, parques e prazas da cidade.
