Notas de prensa

O Consorcio Audiovisual de galicia destinará 21.000 euros para a organización de actividades no eido da formación audiovisual

O secretario xeral de Comunicación da Xunta de Galicia e presidente do Consorcio Audiovisual de Galicia, Fernando Salgado García, e o vicepresidente da Fundación Carlos Casares, Hakan Casares Berg, firmaron un convenio de colaboración que fará posible a realización de diversas actividades relacionadas co desenvolvemento audiovisual en Galicia. Esta colaboración, pla que o Consorcio Audiovisual aportará 21.000 euros, permitirá levar a cabo unhas xornadas sobre o cine e a lingua galega na que participarán persoas vinculadas ao mundo audiovisual e ao eido da defensa da lingua galega.

Fernando Salgado salientou o prestixio da Fundación Carlos Casares na súa “xa longa traxectoria de acción cultural e máis como xeradora de debates no marco da cultura galega”, e isto, afirmou, é “a mellor garantía para promover a sinatura dun convenio que permita, entre outras cousas, garantir a continuidade do curso de verán centrado nas numerosas variantes do audiovisual, que desde 2004 celebra anualmente a Fundación en Celanova”.

Este curso de verán sobre medios audiovisuais e unhas xornadas sobre lingua galega e cine son algunhas das obrigas que establece o convenio de colaboración para a Fundación Carlos Casares. O curso, que comeza hoxe, leva como título Documental: imaxinar a realidade. O presidente do Consorcio Audiovisual destacou que este nome “non pode ser máis suxerinte, ao tempo que oportuno”, e salientou o rexurdir que está a vivir o xénero documental, un xénero que “permite chegar desde o particular ao universal”.

Con motivo deste evento tamén se realizarán proxeccións públicas na praza Maior de Celanova coa finalidade de xerar un interese social pola actividade audiovisual. Por outra parte tamén se levará a cabo unha xornada sobre lingua galega e cine na área de influencia de Vigo co obxectivo de “analizar con rigor a realidade e expectativas desta importante inquedanza social e política”, segundo manifestou Fernando Salgado.

Prioridade ás actividades formativas

O presidente do Consorcio Audiovisual de Galicia referiuse ao sector audiovisual coma un “sector estratéxico económico e cultural para este país”, e sinalou que “a consolidación da Sociedade da Información e do Coñecemento pasa tamén por iniciativas formativas deste tipo, nas que cualificados especialistas transmiten o seu saber ao colectivo cidadán en xeral e ao universitario en particular”.

“O Consorcio Audiovisual de Galicia dá prioridade á área formativa como un dos chanzos que a sociedade galega debe superar para encarrilar a normalidade no eido dunha comunicación globalizada na que a materia audiovisual é fundamental”, indicou Salgado. O Consorcio comprométese así a promover a máxima difusión destas actividades a través dos medios dos que dispón.